अहिलेलाई संशोधनको विषय टुङ्गियो: अध्यक्ष दाहाल

सेतोपाटी संवाददाता

काठमाडौं, भदौ १२

नेकपा माओवादी केन्द्रका अध्यक्ष पुष्पकमल दाहालले नयाँ संसद र सरकार नआउँदासम्मका लागि संविधान संशोधनको विषय टुङ्गिएको बताएका छन्।

विराटनगरमा पत्रकारहरुसँग कुराकानी गर्दै प्रचण्डले अहिलेका लागि संशोधनको विषय अहिले बोलिरहन जरूरी नभएको बताए। प्रधानमन्त्री शेरबहादुर देउवाले संविधान संशोधन विधेयक अगाडि बढाउने बताइरहेका बेला सत्ता साझेदार नेकपा माओवादीका अध्यक्ष प्रचण्डले संशोधनको विषय टुङ्गो लागेको धारणा दिएका हुन्।

'अहिले संशोधनको कुरा टुङ्गिसकेको छ। किनकी राजपा समेत सहभागी भएर संशोधन प्रक्रिया टुङ्गो लगाइएको छ,' अध्यक्ष दाहालले भने, 'अब निर्वाचन गर्ने र निर्वाचन पछि कस्तो सरकार आउँछ कस्तो संसद आउँछ अनि के के संशोधनको आवश्यकता पर्छ? त्यो पछिको कुरा हो।' दाहालले संशोधन गरिहालिन्छ भनेर अहिले बोलिहाल्ने विषय नभएको बताए।

प्रधानमन्त्री देउवाले भारत भ्रमणको क्रममा समेत संविधान संशोधन गर्ने बताएका थिए। आन्तरिक मामलामा भारतमा गएर बोलेको भन्दै उनको आलोचना हुँदै आएको छ। देउवाले आइतबार नेपाल फर्कदा त्रिभुवन अन्तराष्ट्रिय विमानस्थलमा समेत संशोधन फेल भएपनि पुन: ल्याउने बताएका थिए। उनले संशोधन ठिक रहेको र अझै आवश्यक रहेको जिकिर गरेका थिए।

प्रकाशित मिति: सोमबार, भदौ १२, २०७४ ०२:२२

सिफारिस