सत्तारुढ नेपाली काँग्रेसले प्रधानमन्त्री शेरबहादुर देउवाको भारत भ्रमण अत्यन्तै सफल भएको दाबी गरेको छ ।
काँग्रेस कार्यबाहक सभापति विमलेन्द्र निधिले प्रधानमन्त्री देउवाको भारत भ्रमण अत्यन्तै सफल भएको बताएका हुन्। उनले प्रधानमन्त्रीको भारत भ्रमणबाट दुई मुलुकबीचको सम्बन्ध अझै सुदृढ बनेको दाबी गरे ।
आइतबार पार्टी केन्द्रीय कार्यालय सानेपामा पत्रकार सम्मेलन गरी कार्यबाहक सभापति निधिले संविधानको सर्वस्वीकार्यता बढाउने गरी प्रधानमन्त्री देउवाले भारत भ्रमणका क्रममा दिएको अभिव्यक्ति औचित्यपूर्ण, अत्यन्तै परिपक्व र सार्थक पहल भएको दाबी गरे ।
प्रधानमन्त्री देउवाले भारत भ्रमणको क्रममा संविधानको बारेमा दिएको अभिव्यक्ति विवादित बनेको छ । तर, काँग्रेस कार्यबाहक सभापति निधिले संविधानमा अन्तराष्ट्रिय समुदायको स्वागत र समर्थन लिन पनि प्रधानमन्त्री देउवाले दिएको अभिव्यक्ति औचित्यपूर्ण रहेको तर्क गरे ।
काँग्रेस कार्यबाहक सभापति निधिले एमाले अध्यक्ष केपी ओलीको चीन भ्रमण र वरिष्ठ नेता माधव नेपालको उत्तर कोरिया भ्रमण आपत्तिजनक रहेको आरोप पनि लगाए ।
उनले ओलीले चीन भ्रमणको बेला संघीयताको विरोधमा चिनियाँ नेताहरूसँग छलफल गरेर नेपालको शिर निहुर्याएको आरोप लगाए । उनले माधव नेपालले सरकारको अनुमति विनानै उत्तर कोरियाको भ्रमण गरेकोमा पनि आपत्ति जनाए ।
एमाले अध्यक्ष ओलीले भारत भ्रमणका क्रममा प्रधानमन्त्री देउवाले संविधानका विषयमा दिएको अभिव्यक्तिले नेपालको शिर निहुर्याएको भन्दै कडा आलोचना गरेका थिए । सोही प्रसंग कोट्याउँदै काँग्रेस कार्यबाहक सभापति निधिले प्रधानमन्त्री देउवाले संविधानमा अन्तराष्ट्रिय समुदायको स्वागत र समर्थन बटुल्न भारत भ्रमणमा पनि सो विषयमा वकालत गरेको प्रष्टिकरण दिए ।