भारतीय प्रधानमन्त्री नरेन्द्र मोदीले भारत र नेपालको सुरक्षा हित एक दोस्रोमा निर्भर रहेको बताएका छन्। प्रधानमन्त्री शेरबहादुर देउवाको भारत भ्रमणका क्रममा संयुक्त पत्रकार सम्मेलनलाई सम्बोधन गर्दै मोदीले रक्षा र सुरक्षा एजेन्सीबीचको सहकार्य थप आवश्यक रहेको बताएका हुन्।
भारत र चीनबीच भुटान र चीनको सीमामा तनाव जारी रहँदा मोदीले संयुक्त पत्रकार सम्मेलनमा सुरक्षाको विषय उल्लेख गरेका हुन्।
'सुरक्षामा सहयोग हाम्रो पार्टनसिपको सबैभन्दा मत्वपूर्ण पक्ष हो। हाम्रो सुरक्षा हित पनि एक अर्कोसँग निर्भर छ। साथै एक दोस्रोसँग जोडिएको छ। हाम्रो खुल्ला सीमाको दुरूपयोग रोक्नका लागि दुई देशका जनताको सुरक्षाका लागि हाम्रो डिफेन्स र सेक्युरिटी क्लोज कोअपरेशन महत्वपूर्ण छ', मोदीले भने।
मोदीले संयुक्त पत्रकार सम्मेलनको सुरुवातमा नेपाली बोल्दै भारत भ्रमणमा प्रधानमन्त्री देउवाको सहितको भ्रमण टोलीको स्वागत गरेका थिए।
यद्यपी भारतले संविधान जारी भएयताको आफ्नो नेपाल धारणामा परिवर्तन नल्याएको मोदीको वक्तव्यबाट दखिएको छ। स्थानीय तहको निर्वाचन सम्पन्न हुनुलाई मोदीले लोकतान्त्रिक प्रक्रिया भन्दै बधाई दिएका छन्।
तर संविधान जारी गर्नु अघि देखिकै नेपालका सबै पक्षलाई समेट्ने विषयमा वार्ता र संवाद कायम राख्न भारतले पुनः सुझाएको छ।
'मलाई विश्वास छ तपाईँको कुशल नेतृत्वमा समाजका सबै वर्गसँग कुराकानी गर्ने प्रक्रिया जारी राखेर नेपाल आफ्ना सबै नागरिकको आकांक्षा समाहित गर्दै संविधानलाई सफलताका साथ लागू गर्न सक्छ', मोदीले भने।
मोदीले नेपाल र भारतको सम्बन्ध हिमालय जत्तिकै पुरानो रहेको बताए। साथै भारत नेपालमा शान्ति स्थायीत्व र आर्थिक समृद्धिप्रति हमेसा सजग रुहेको उल्लेख गरे।
उनले नेपालमा भारतीय सहयोगबाट चलिरहेका हुलाकी सडक, ट्रान्समिसन लाइन र एकीकृच जाँच चौकीमा काम भैरिहेको बताए।
साथै प्रधानमन्त्री देउवाले अरूण ३ ए को शिलन्यासका लागि आफूलाइ निम्तो दिएको उल्लेख गरे। उनले पञ्चेश्वर बहुउद्देश्यिय आयोजनाको डिपिआर अन्तिम रुप दिन तीव्रता ल्याउने बताए।
भारतीय प्रधानमन्त्री मोदीले सीमा क्षेत्रमा देखिने गरेको बाढीको समस्याको स्थायी समाधान आवश्यक रहेको बताए। त्यसका लागि दुई पक्षबीच कोअर्डिनेशन र कन्सल्टेसन आवश्यक रहेको उल्लेख गरे।
नेपाल र भारतबीच आज आठ एमओयूमा हस्ताक्षर भएको छ। जसमध्ये चार भूकम्प पछिको पुर्ननिर्माणमा जारी छ।
