नेकपा माओवादी केन्द्रका अध्यक्ष पुष्पकमल दाहालले स्थानीय तह तेस्रो चरणको निर्वाचनमा आफ्नो पार्टी पहिलो शक्ति बन्ने दाबी गरेका छन् ।
पार्टी निकट विद्यार्थी संगठन अनेरास्ववियू क्रान्तिकारीको २१ राष्ट्रिय सम्मेलनलाई बुधबार काठमाडौंमा उद्घाटन गर्दै उनले सो कुरा बताएका हुन् ।
अध्यक्ष दाहालले मधेशमा आफ्नो पार्टीको पक्षमा जनलहर नै सृजना भएको दाबी गरे।
यसका साथै उनले मधेशका जनताले आफ्नो पार्टीलाई असल मित्रको रुपमा लिएको उल्लेख गर्दै प्रदेश नम्बर २ को स्थानीय तह निर्वाचनमा आफ्नो पार्टी पहिलो शक्ति बन्ने दाबी गरे । उनले अर्को हप्ता मधेश केन्द्रीत राजनीतिक दलका हजारौं कार्यकर्ता आफ्नो पार्टीमा प्रवेश गर्ने पनि बताए ।
अध्यक्ष दाहालले राष्ट्रलाई एकताबद्ध बनाउन पार्टीका युवा, विद्यार्थी नेताहरुलाई आह्वान गरेका छन् । उनले प्रतिगमनकारी र प्रतिक्रियावादीहरू विरुद्ध प्रतिवाद गर्न पनि पार्टीका युवा, विद्यार्थीहरुलाई निर्देशन दिए ।
युवा, विद्यार्थी संगठनहरू लक्ष्यविहिन बन्दै गएकोमा चिन्ता पनि व्यक्त गर्दै मुलुकलाई समृद्ध बनाउने योजना ल्याउन युवा, विद्यार्थीहरुलाई उनले आग्रह गरे ।