कार्यबहाक प्रधानमन्त्री विजयकुमार गच्छदारले प्रदेश सभा र प्रतिनिधि सभा निर्वाचन दुई चरणमा हुने बताएका छन् ।
बुधबारबाट शुरू भएको पार्टी केन्द्रीय कार्य सम्पादन समितिको बैठकमा बोल्दै उनले सो कुराको जानकारी दिएका हुन् ।
सरकारले दुवै तहको निर्वाचन आगामी मंसीर १० गते गर्ने निर्णय गरेको थियो । तर कार्यबहाक प्रधानमन्त्री गच्छदारले मंसिर १० गते पहिलो चरणको निर्वाचन हुने र दोस्रो चरणको निर्वाचनको मिति अब तत्काल घोषणा गर्ने तयारी भइरहेको प्रष्टयाए ।
उनले पहिलो चरणमा हिमाल र पहाड तथा दोस्रो चरणमा तराईमा निर्वाचन हुने गरी तयारी गर्न प्रधानमन्त्री शेरबहादुर देउवाले निर्वाचन आयोगलाई सन्देश दिएका खुलासा पनि गरे ।
निर्वाचन आयोगले प्रदेश सभा र प्रतिनिधि सभा निर्वाचन एकैचरणमा गर्न नसकिने अडान राख्दै आएको छ । उनले निर्वाचन आयोगको आग्रह समेतलाई ध्यानमा राखेर प्रदेश सभा र प्रतिनिधि सभा निर्वाचन दुई चरणमा गर्न सरकार प्रतिबद्ध रहेको बताए ।
नेपाल लोकतान्त्रिक फोरमको अध्यक्ष समेत रहेका उनले बुधबारबाट शुरू भएको पार्टी केन्द्रीय कार्य सम्पादन समितिको बैठकमा बोल्दै मंसिर २५ गतेभित्र प्रदेश सभा र प्रतिनिधि सभाको निर्वाचन दुई चरणमा सम्पन्न गर्ने सरकारको योजना रहेको सुनाए ।
कार्यबहाक प्रधानमन्त्री गच्छदारले प्रदेश सभा र प्रतिनिधि सभा निर्वाचन आगामी मंसिर १० गतेबाट शुरू हुने पनि स्पष्ट पारे ।
उनले स्थानीय तह तेस्रो चरणको निर्वाचनको तयारीमा जुट्न नेपाल लोकतान्त्रिक फोरमका पार्टी नेता कार्यकर्तालाई निर्देशन दिए । गच्छदारले पार्टीलाई विजयी बनाउन सिंगो पार्टी पंक्तिलाई परिचालित हुन आह्वान गरेका छन्।
गच्छदार नेतृत्वको नेपाल लोकतान्त्रिक फोरमले आसन्न निर्वाचनको तयारीका लागि आवश्यक रणनीति तय गर्न पार्टी केन्द्रीय कार्यसम्पादन समितिको बैठक बोलाएको हो ।
