एमाले अध्यक्ष केपी ओलीले वर्तमान सरकारले देशका समस्याप्रति कुनै चासो नदेखाएको आरोप लगाएका छन्। व्यवस्थापिका संसदको बैठकमा विशेष समय लिएर बोल्दै एमाले अध्यक्ष ओलीले संविधान संशोधन विधेयक सरकारकै कारण असफल भएको देखि बाढीपीडित र भूकम्पपिडितलाई राहत दिन नसकेको सम्मका आरोप लगाए। संसदमा एक घण्टा १० मिनेट बोल्ने क्रममा उनले सरकारलाई आधा दर्जन आरोप लगाए।
पहिलो आरोपसंसदमा बोल्ने क्रमको सुरुमै ओलीले भारत भ्रमणबारे सरकारले संसदलाई कुनै जानकारी नदिएको आरोप लगाए। ‘प्रधानमन्त्री भारत जादै हुनुहुन्छ भन्ने सुनेको छु । तर संसदलाई जानकारी छैन,’ उनले भने, ‘उहाँ किन जादै हुनुहुन्छ। भ्रमणका एजेण्डा के हुन? संसदलाई भन्नुभएको छैन। यो उहाँको जिम्मेवारीपनको कमी हो।’
प्रमुख प्रतिपक्षको संवैधानिक हैसियतलाई सरकारले बेवास्ता गरेको उनले बताए ।
सरकारमा यती धेरै मन्त्री हुँदासमेत सरकारका बरिष्ठ मन्त्रीहरू संसदमा नआएको उनको आरोप छ।
दोस्रो आरोपसरकारले निर्वाचन कानुन बनाउन ढिलो गरेको उनको अर्को आरोप थियो। सरकारले मंसिरमा निर्वाचन हुने भने पनि निर्वाचन कानुनको कारणले निर्वाचनलाई असर पार्न सक्ने उनले बताए। निर्वाचन सम्बन्धी कानुन छिटो ल्याउन समेत उनले सरकारको ध्यानाकर्षण गराए।
तेस्रो आरोपशिक्षण अस्पतालका डाक्टर गोविन्द केसीको अनशनलाई लिएर एमालेलाई जोडेको भन्दै उनले सरकारप्रति आक्रोश पोखेका थिए।
चिकित्सा शिक्षा विधेयक पारित नहुनुमा एमाले दोषी रहेको भन्ने आरोपको उनले खण्डन गरे। ‘हरेक घट्नामा प्रतिपक्षलाई आरोप लगाइएको छ। डाक्टर गोविन्द केसीको अनशनमा एमालेललाई किन जोडियो?’, उनले भने, ‘सरकारले चाहने हो भने विधेयक पारित हुन्छ तर सरकारले किन गरेन?’
चौथो आरोपओलीले सरकारकै कारण संविधान संशोधन असफल भएको आरोप लगाए। व्यवस्थापिका संसदको बैठकमा विशेष समय लिएर बोल्दै अध्यक्ष ओलीले सरकारले विधेयक पास हुँदैन भनेर जान्दा जान्दै पनि विधेयक निर्णयार्थ पेस गरेको बताए।
‘संविधान संशोधन विधेयकमा हामीसँग छलफल गरिएन। हामीले पटक–पटक छलफल गरौं भन्दा सरकारले मानेन,’ उनले भने,‘विधेयक पास हुँदैन भन्ने सरकारलाई थाहा थियो त्यसैले सरकारले फेल गराउन ल्याएको हो।’
संविधान संशोधन विधेयक पास नभए पनि संविधान निर्माणमा सहभागि नभएका दलहरुले समेत संविधान संशोधन प्रक्रियामा भाग लिनु सकारात्मक भएको उनले बताए।
‘यो संविधानलाई संसदमा रहेका सबै दललले स्वीकारेका छन्।अब संविधान सर्वस्वीकार्य भएको छ,’ उनले भने, ‘संविधान निर्माणका बेला बाहिर रहेकाहरु पनि सहभागि हुनु उपलब्धिमुलक हो।’
पाँचौ आरोपसरकारले भूकम्पपीडितको पुनर्स्थापनाका लागि कुनै पहल नगरेको आरोप लगाए। भूकम्पपीडित अहिले पनि पाल मुन बस्न बाध्य रहेको उनले बताए। बाढीपीडितको उद्धारका नाममा समेत सरकारले राजनीति गरेको उनको अरोप थियो।
सरकारले हेलिकप्टर लिएर राहत बाढ्न गएको तर प्रतिपक्षलाई भने सहभागि नगराएको उनले आक्रोश थियो।
‘तलको बाटो जान सक्ने अवस्था छैन। हेलिकप्टर हाम्रो पहुँचमा छैन,’ उनले भने, ‘सत्ता पक्ष राज्यको शक्तिकै दुरूपयोग गरेर हेलिकप्टर चढेर जान्छन् अनि आफैंले राहत बाढे जस्तो गर्छन्। हेलिकप्टर तिनको निजी सम्पत्ति हो?’
छैठौं आरोपडिआइजी नवराज सिलवालको नाम नलिइकन ओलीले सिलवालमाथि सरकारले घोर अन्याय भएको बताए।
‘एउटा पुलिसको विरुद्धमा राज्य यसरी लाग्न मिल्छ?आइजीको दौडमा रहेको व्यक्तिलाई एआइजी पनि नबनाउने? यो कहाँसम्मको अन्याय हो?’, उनले भने, ‘मैले एउटा व्यक्तिको पक्षपोषण गरको होइन। प्रणालीको भविष्यको चिन्ता गरेको हो।’
प्रजातन्त्रका पक्षमा लड्नेहरू सबैले यस्ता प्रवृत्तिका विरुद्धमा लडेको ओलीले बताए।
सर्वोच्चमाथि पनि खनिए ओलीओलीले राप्रपा विभाजनलाई लिएर सर्वोच्च अदालतले गलत आदेश दिएको आरोप लगाएका छन्।
निर्वाचन आयोगको निर्णयलाई बेवास्ता गर्दै अदालतले आफूखुसी निर्णय गरेको आरोप लगाए।
‘नेपाल अचम्मको देश भयो। निर्वाचन आयोगले सनाखद गर्न आएन भनेको छ तर सर्वोच्चले सनाखद चाहिदैन भन्छ,’ ओलीले भने, ‘लोकतन्त्र क्षणिक लाभका लागि दुरूपयोग गर्ने प्रणाली होइन।’
हेर्नुहोस् भिडियो 
