प्रमुख निर्वाचन आयुक्त अयोधीप्रसाद यादवले मुलुकको भौगोलिक अवस्था र निर्वाचनको तयारीलगायतका प्राविधिक कारणले मंसिर १० गतेको लागि तोकिएको प्रदेश र संघीय संसदको निर्वाचन अर्को चरणमा पनि हुन सक्ने सम्भावना व्यक्त गरेका छन् ।
मंगलबार राजधानीमा आयोजित एक कार्यक्रममा उनले सो कुराको जानकारी दिएका हुन् ।
कार्यक्रममा उनले भने,‘संविधान सभाको निर्वाचनको बेलामा पनि मंसिर ४ गते हिमाली भेगमा हिउँ परेको थियो । अहिले पनि त्यो सम्भावना छ, प्राकृतिक चुनौती आइपरे हामी दोस्रो चरणमा जानैपर्छ ।’ उनले आफूहरूले भौगोलिक अवस्था र निर्वाचनको प्राविधिक तयारीको अवस्थालाई लक्षित गरेर मंसिर ४ र २१ गते गरी दुई चरणको निर्वाचनको प्रस्ताव गरेको उल्लेख गर्दै चुनौतीलाई मध्यनजर गर्दा मंसिर १० को निर्वाचन दुई चरणमा पनि हुनसक्ने तर्क गरे ।
उनले भने,‘ अहिलेसम्म निर्वाचन कानून आइसकेको छैन, निर्वाचन क्षेत्र निर्धारण आयोगको प्रतिवेदन पनि आइसकेको छैन । हामीलाई निर्वाचनको तयारीको लागि पनि पर्याप्त समय दिइएको छैन । नियन्त्रण बाहिरको परिस्थिति आए निर्वाचन अर्को चरणमा पनि हुन सक्छ ।’
यादवले अहिलेको चुनावमा मतपत्रको व्यवस्थापन सबैभन्दा ठूलो चुनौती भएको भन्दै आयोगले दुईवटा मतपत्रमार्फत निर्वाचन गराउने तयारीमा आफूहरु रहेको स्पष्ट पारे । यद्यपि उनले राजनीतिक वृत्तबाट बाहिर आए जस्तो चार वटा मतपत्रबाट चुनाव गराउने गरी कानून निर्माण गरे तोकिएको मितिमा निर्वाचन गर्न नसक्ने दाबी गरे ।
उनले भने,‘ हामी अहिले तोकिएकै मितिमा निर्वाचन गर्ने गरी तयारीमा जुटेका छौँ । स्थिति प्रतिकुल भए त्यसपछि सोचौँला । अहिले हामीले निर्वाचनको मितिको लागि सरकारलाई धन्यवाद दिइसकेका छौँ ।’
यादवले दलहरुले नै नमानेकोले आगामी निर्वाचनमा पनि भोटिङ मेसिनको प्रयोग नहुने स्पष्ट पारे । उनले असोज २ गतेको तेस्रो चरणको स्थानीय निर्वाचनको मिति कुनै पनि हालतमा नसर्ने दाबी गर्दै बाढीका कारण उत्पन्न समस्या समाधानको लागि आफूले प्रधानमन्त्रीसँग आग्रह गरिसकेकोले मतदान केन्द्रसम्मको बाटोसहितको व्यवस्था सरकारले गर्ने विश्वास व्यक्त गरे ।