पत्रकार उजिर मगरलाई प्रेस सेन्टर, नेपालले साधारण सदस्यसमेत नरहने गरी निष्कासन गरेको छ। प्रेस सेन्टर नेपालले सोमबार एक विज्ञप्ति जारी गरी सो कुराको जानकारी दिएको हो ।
उनी अघिल्लो पटक प्रेस सेन्टरको तर्फबाट उम्मेदवार बनेर महासचिवमा विजयी भएका थिए ।
अघिल्लो पटक प्रेस सेन्टरको तर्फबाट उम्मेदवार बनेर महासचिवमा विजयी भएका मगरले यसपटक संगठनको निर्णयविपरीत अध्यक्ष पदमा उम्मेदवारी दिएपछि उनलाई कारबाही गरिएको सेन्टरले सोमबार विज्ञप्तिमार्फत जनाएको छ।
'पत्रकार महासंघको २५ औं महाधिवेशनमा संगठनले अध्यक्षमा गोविन्द आचार्यलाई उम्मेदवार बनाएकोमा उजिर मगरले संगठनको निर्णयविपरीत अध्यक्ष पदमा उम्मेदवारी दिई संगठनप्रति गम्भीर घात गर्नुभएको छ,' सेन्टरद्वारा जारी विज्ञप्तिमा भनिएको छ, 'उम्मेदवारी फिर्ता लिई संगठनको निर्णय मान्न पटक-पटक निर्देशनात्मक आग्रह गर्दा पनि नमानी आफ्नो उम्मेदवारी कायमै राखेकाले उजिर मगरलाई आजकै मितिदेखि प्रेस सेन्टरको साधारण सदस्यबाट निष्कासित गरिएको सबैमा जानकारी गराइन्छ।'
'पत्रकार महासंघको महासचिव भइसकेपश्चात उहाँले गरेका काम, कारबाही र कार्यशैलीका कारण प्रेस सेन्टरलाई क्षति तुल्याएको छ,' विज्ञप्पतिमा भनिएको छ, 'पत्रकार महासंघका बहालवाला केन्द्रीय सदस्यले समाचारलाई आधार बनाएर लाखौँ रुपैयाँ बार्गेनिङ गरेको घटनामा खेलेको भूमिका, पत्रकार महासंघको काठमाडौं शाखाको निर्वाचनमा संस्थागत धाँधली गरी प्रेस सेन्टरका उम्मेदवारलाई पराजित गरेकोलगायतका घटना संघठनको हितविपरीत छन्।'