राष्ट्रिय प्रजातन्त्र पार्टी (राप्रपा)ले पार्टी हृविप विपरित कार्य गरेको भन्दै १८ जना सांसदलाई कारबाही गर्ने निर्णय गरेको छ।
पछिल्लो राजनीतिक परिस्थितिबारे छलफल गर्न मंगलबार राप्रपाका पदाधिकारी तथा सांसदहरुको संयुक्त बैठकले संसदमा सोमबार संविधान संशोधनको प्रक्रियामा सहभागी नभएका १८ सांसदलाई कारबाही गर्ने निर्णय गरेको हो।
राप्रपाबाट अलग भएर राप्रपा प्रजातान्त्रिक गठनको प्रयत्न गरेका सांसदहरू दीपक बोहोरा, विक्रम पाण्डे, सुनिल थापा, बिराज बिष्ट, रेशम लामा, विक्रम थापा, सइन्द्र बान्तवा, कमला शर्मा र भानु महरा, रामकुमार सुब्बा, बबिना मोक्तान, सीता लुईटेल, राज्यलक्ष्मी श्रेष्ठ, लक्ष्मी थापा पासवान, सरोज शर्मा, आनन्दी पन्त, इस्तियाक अहमद खान र गीता सिंहले अनुपस्थित थिए।
उनीहरू पशुपतिशम्शेर जबराको पक्षमा रहेको भन्दै आफूहरू संशोधन प्रक्रियामा भाग नलिने बताएका थिए।
यस्तै राप्रपाले सर्वोच्च अदालतको आदेशविरुद्ध कानुनी उपचार खोज्ने निर्णयसमेत गरेको छ।
राप्रपाले सर्वोच्च अदालतले राप्रपा प्रजातान्त्रिकको दल दर्ता गर्न निर्वाचन आयोगलाई दिएको आदेशविरुद्ध कानुन व्यवसायीसँग वृहत परामर्श गरेर उपर्युक्त कानुनी उपचार खोज्ने भएको छ।