संविधान संशोधनको मतदानमा राप्रपाबाट विभाजित भएको प्रस्तावित राप्रपा प्रजातान्त्रिकले भाग नलिने भएको छ।
सर्वोच्चले दल दर्ताको प्रकृया अघि बढाउन निर्देशन दिए पनि नयाँ दल दर्ता नभइसकेकाले संशोधनमा भाग लिने पशुपति शम्शेर राणा पक्षका नेता सुनिलबहादुर थापाले जानकारी दिए।
'हामीले राप्रपा छोडिसक्यौं, 'सेतोपाटीसँग उनले भने, 'सर्वोच्चले आदेश दिए पनि राप्रपा प्रजातान्त्रिक निर्वाचन आयोग र संसद सचिवालयमा दर्ता भएको छैन। त्यसैले हामी संविधान संशोधनमा भाग लिँदैनौं।'
सर्वोच्च अदालतले आज नै दल दर्ताको प्रकृयाअघि बढाउन निर्वाचन आयोगलाई निर्देशन दिएको हो।
सर्वोच्चबाट फैसला आउँदा संसदमा संशोधन विधेयकमाथि मतदान पनि सुरू भइसकेको हुँदा सहभागी हुन नसकेको उनले बताए।
संविधान संशोधनका बारेमा पार्टीको धारणा भने बैठक बसेर तय गर्ने उनले बताए।
'हामी छलफल गरेर पार्टीको धारणा तय गर्छौं,' उनले भने ।
उनले राप्रपा अध्यक्ष कमल थापालाई सरकारमा सहभागी नगराएकाले संशोधन विधेयकको विपक्षमा मतदान गर्ने निर्णय गरेको आरोप लगाए।
'उहाँ यो संशोधनको 'आर्किटेक्ट' हो,' नेता थापाले भने, 'उहाँले बैठकमा हामीलाई किन संशोधन चाहिन्छ भन्ने व्याख्या गर्नुभएको थियो। तर उपप्रधानमन्त्रीका रूपमा सरकारमा जान नपाएपछि यु-टर्न हुनुभयो।'
तत्कालीन प्रधानन्याधीश सुशीला कार्कीको महाअभियोगमा असन्तुष्टी जनाउँदै सरकार छोडेपछि थापाले पार्टीमा संशोधन विधेयकको पक्षमा उभिने निर्णय गराएका थिए।
उनले सार्वजनिक रूपमा पनि यो संशोधन विधेयकका पक्षमा अभिव्यक्ति दिएका थिए। आज भएको संशोधन प्रस्तावमाथिको मतदानमा भने उनले विपक्षमा मतदान गर्ने निर्णय गरे।
अर्को प्रसङ्गमा नेता थापाले दल दर्ताका लागि भोलि नै निर्वाचन आयोग जाने बताए।