पशुपति शम्शेर राणाको रिटमाथिको सुनुवाई 'हेर्दाहेर्दै'मा सर्‍यो

सेतोपाटी संवाददाता

काठमाडौं, भदौ ४

आफूलाई छुट्टै दलको रूपमा दर्ता गर्ने आदेश दिन माग गर्दै प्रस्तावित राष्ट्रिय प्रजातन्त्र पार्टी (प्रजातान्त्रिक)का अध्यक्ष पशुपति शम्शेर राणाले दिएको रिटमाथिको सुनुवाई हुँदाहुँदै समय सकिएपछि सोमबारलाई सरेको छ।

न्यायाधीश तेजबहादुर केसीको इजलासले यो रिटमाथिको पहिलो सुनुवाई गरिरहेको थियो। आज सुनुवाई नसकिएकाले सोमबारलाई सरेको सर्वोच्च प्रवक्ता नारायण प्रसाद पन्थीले बताए।

साउन २२ गते निर्वाचन आयोगलाई बुझाएको ४० प्रतिशत केन्द्रीय सदस्यको नामावली र हस्ताक्षर कै आधारमा छुट्टै दल दर्ता गर्ने आदेशको माग गर्दै पशुपति शम्शेर राणा नेतृत्वको राप्रपा (प्रजातान्त्रिक) ले शुक्रबार सर्वोच्च अदालतमा रिट दिएको थियो।

राष्ट्रिय प्रजातन्त्र पार्टी फुटाएर राप्रपा (प्रजातान्त्रिक) दर्ता गर्न राणाले साउन २२ गते निर्वाचन आयोगमा ६४ सांसदको हस्ताक्षरसहित निवेदन दिएका थिए। तर, आयोगले ती हस्ताक्षर सनाखत गर्नुपर्ने भन्दै भदौं ४ गतेसम्मको अवधि दिएको थियो। आयोगको यहि निर्णय विरुद्ध राणा सर्वोच्च अदालत गएका हुन्।

प्रकाशित मिति: आइतबार, भदौ ४, २०७४ ०७:५०

सिफारिस