मङ्गलबार बस्ने भनिएको व्यवस्थापिका बैठकमा संविधान संशोधन र चिकित्सा शिक्षा विधेयक दुवै पेस नहुने भएको छ।
यी दुवै विधेयक आजको कार्यसूचीमा छैन। देशमा बाढी पहिरोको पीडा भएकाले दलहरू विभाजित हुने कार्यसूची नराखिएको नेपाली कांग्रेस संसदीय दलका प्रमुख सचेतक चिनकाजी श्रेष्ठले सेतोपाटीलाई बताए ।
‘संविधान संशोधन विधेयक ल्याउनका लागि सांसदहरू तराई /मधेशमा केन्द्रीत छन्। त्यसैले संविधान संशोधन विधेयकमाथिको छलफल गर्ने अवस्था रहेन।’ उनले भने ‘चिकित्सा विधेयकले पनि डा केसीको मागलाई सम्बोधन नगर्ने भएकोले छलफलको अझै जरुरी देखियो।’
बाढी पीडितको उद्धारमा जुट्न परेकाले अन्य विषय ओझेलमा परेको उनले बताए ।
त्यस्तै महिला, बालबालिका तथा समाज कल्याण समितिकी सभापति रञ्जु झाले भनिन् ‘चिकित्सा शिक्षा विधेयक कसरी पारित गर्ने भन्ने सरकारको कुरा हो। समितिबाट पारित गरेपछि अनशन तोडिन्नछ भनेर मन्त्रीहरूले नै भन्नुभएको हो। विधेयक संसदमा पेश गर्नका लागि पनि प्रक्रिया पुरा गर्नुपर्छ।विधेयक छाप्नु पर्छ ।यसको लागि समय चाहिन्छ ।आज पेश हुन कठिन छ ।’
यसअघि सरकारले अाजको बैठकमा संशोधन विधेयकमाथि परेकाे संशोधनमाथि छलफल गराउने तयारी गरेकाे थियो।
*सच्याइएको