सिमावर्तीका बाँध भत्काउन कुटनीतिक कदम चाल्न चुरे भावरको आग्रह

सिमावर्तीका बाँध भत्काउन कुटनीतिक कदम चाल्न चुरे भावरको आग्रह




भारतीय पक्षले तराईका सीमावर्ती जिल्लामा बनाएको तटबन्ध र बाँधलाई भत्काउन तत्काल कुटनीतिक कदम चाल्न चुरे भावर राष्ट्रिय एकता पार्टीले सरकारसमक्ष माग गरेको छ।

अविरल वर्षाका कारण बाढी र डुवानमा परेर ५० जना भन्दा बढीको ज्यान गएकोमा दुःख ब्यक्त गर्दै सो पार्टीले सीमावर्ती क्षेत्रमा बनाएका वाँध नभत्काएसम्म तराईको भुमी डुवानमा परिरहने पनि जनाएको छ।

अध्यक्ष बद्रीप्रसाद न्यौपानेको अध्यक्षतामा बसेको केन्द्रीय कार्य सम्पादन समितिको बैठकले सो माग अघि सारेको हो। ‘भारतले सीमा क्षेत्रमा बनाएको उच्च सडक, बाँध र तटबन्धका कारण नेपालको तराई क्षेत्रमा डुबान भएको चुरेभावर पार्टीको ठहर छ,’ सो पार्टीले भनेको छ, ‘नेपाल र नेपालीहरूलाई क्षति हुने गरेर बनाइएका त्यस्ता संरचनाहरू हटाउने विषयमा भारतसँग कूटनीतिक पहलमार्फत तत्काल समाधान खोज्न नेपाल सरकारको ध्यानाकर्षण गराउन चाहन्छौँ ।’

पार्टीले मातहातका जिल्ला कमिटिलाई बाढी र डुवानमा परेकाको तत्कालै उद्धार कार्यमा सक्रियतापूर्वक खट्न र उपलब्ध राहत वितरण गर्न पनि निर्देशन दिएको छ।

पार्टीले बाढी, डुवान र पहिरोबाट अर्बौको धनजनको क्षति भएको तर सरकारले सो क्षतिलाई न्यूनीकरण गर्न कुनै पूर्व तयारी नगरेको आरोप लगाउँदै पीडितलाई तत्काल उद्धार, राहत र क्षतिपुर्तिको व्यवस्था गराउन पनि माग गरेको छ।

‘सरकारले बाढी पीडितहरूको उद्धार र राहत वितरणमा जसरी काम गर्नुपर्ने हो त्यो नगरेको हाम्रो पार्टीको ठहर छ’ सो आरोप लगाउँदै पार्टीले भनेको छ, ‘सरकारले छिटोभन्दा छिटो बाढी पीडितहरूलाई खाने, बस्ने, शुद्ध पिउने पानी, औषधि र बालबच्चाहरूको उचित स्याहार सुसारका लागि पहल गर्न गम्भीर ध्यानाकर्षण गराउँछौँ।’

मृतक प्रति श्रद्धाञ्जली ब्यक्त गर्दै परिवारजन प्रति हार्दिक समवेदन प्रकट गरेको सो पार्टीद्धारा जारि बिज्ञप्तिमा उल्लेख छ।

प्रतिकृया दिनुहोस

© 2017 Setopati Sanchar Pvt. Ltd.