राप्रपा राणा समूहका लागि निर्वाचन आयोगले सूचना निकाल्यो, ४ गतेसम्ममा पार्टी दर्ता गराउन आग्रह


राष्ट्रिय प्रजातन्त्र पार्टी (प्रजातान्त्रिक)ले निर्वाचन आयोगमा सांसद तथा केन्द्रीय सदस्यको दस्तखत सनाखत नबुझाएपछि आयोगले भदौ ४ गतेसम्मको समय दिएको छ। पार्टीका अध्यक्ष पशुपतिशमशेर राणाले केन्द्रीय सदस्यको दस्तखत सनाखतका लागि समय माग गर्दै निवेदन दिएका थिए।

राणा समूहले गत साउन २२ गते पार्टी विभाजनका लागि सांसद तथा केन्द्रीय सदस्य रहेको दाबी गर्दै आयोगमा हस्ताक्षर बुझाएको थियो ।

राष्ट्रिय प्रजातन्त्र पार्टीबाट विभाजनको घोषणा गरेको उक्त पार्टीले ४० प्रतिशत सांसद तथा केन्द्रीय सदस्य आफ्नो पक्षमा रहेको पुष्टी गर्नुपर्ने कानुनी व्यवस्था छ । सोही नियमअनुसार आयोगले राप्रपा (प्रजातान्त्रिक) का नेतालाई हस्ताक्षर सनाखत गर्न दिएको समयमा नसकेकाले सोमबार गोरखिपत्रमा सूचना प्रकाशित गरेर ४ गते १० बजेदेखि ५ बजेसम्मको समयसीमा दिएको हो।

यसैबीच, राष्ट्रिय प्रजातन्त्र पार्टीले आयोगको समयसीमाभित्र राणा समूहले हस्ताक्षर सनाखत गर्न नसकेका कारण पार्टी विभाजन प्रक्रिया अगाडि नबढाउन निवेदन दर्ता गराएको छ ।

पार्टीका महामन्त्री राजेन्द्र लिङदेनको नेतृत्वमा आयोगमा गएको प्रतिनिधिमण्डलले सो निवेदन दर्ता गराएको हो।

Share:

© 2017 Setopati Sanchar Pvt. Ltd.