चालिस प्रतिशत पुर्‍याउन नसकेपछि राप्रपा प्रजातान्त्रिकले माग्यो थप समय


राप्रपाबाट विभाजित हुने प्रयासमा रहेको राप्रपा प्रजातान्त्रिक आज निर्वाचन आयोगमा दर्ता हुन सकेन ।

निर्वाचन आयोगले दिएको आज ११ देखि ५ बजे भित्रको समयमा ४० प्रतिशत केन्द्रीय सदस्य उपस्थित गराउन नसकेपछि आज दर्ता हुन नसकेको हो।

पशुपति शम्शेर राणा पक्षले देशभरी आइरहेको बाढीपहिरोका कारण आफ्ना पक्षका केन्द्रीय सदस्य आयोगमा उपस्थित हुन नसकेपछि थप दश दिन समय माग गरेको छ।

राणा पक्षले पार्टी फूटेको भन्दै निवेदन दिएपछि निर्वाचन आयोगले ४० प्रतिशत केन्द्रीय सदस्य आफ्नो पक्षमा रहेको प्रमाणित गर्न आज बिहान ११ बजेदेखि ५ बजेसम्मको समय दिएको थियो। तर, आज राणा पक्षका केन्द्रीय सदस्यहरू आयोगमा उपस्थित नभएको र थप दश दिन समय मागेको आयोग स्रोतले जानकारी दिएको छ।

उनीहरूलाई थप समय दिने वा नदिने भन्ने विषयमा आयोगले निर्णय भने गरेको छैन। राजनीतिक दल सम्बन्धि ऐन अनुसार पार्टी विभाजन गर्न यसको चालिस प्रतिशत केन्द्रीय सदस्य हुनु जरूरी छ। निर्वाचन आयोगले राप्रपाको १५६ जनाको केन्द्रीय समितिलाई मान्यता दिएको छ। त्यसैले पार्टी विभाजन गर्न कम्तीमा ६३ केन्द्रीय सदस्य राणापक्षमा हुनु जरूरी छ।

कमल थापा पक्षले राणाले ४० प्रतिशत केन्द्रीय सदस्य नपुग्ने दाबी गरिरहेको छ। तर, राणा पक्षले भने आफूसँग ४० प्रतिशत भन्दा धेरै केन्द्रीय सदस्य रहेको दाबी गर्दै आएको छ। यो ऐनअनुसार पार्टी विभाजन हुन संसदीय दलमा पनि ४० प्रतिशत हुनु पर्छ। विभाजित राप्रपासँग २० जना सांसद छन्। जुन जम्मा सांसद संख्या ३७को ५० प्रतिशत भन्दा धेरै हो।

Share:

© 2017 Setopati Sanchar Pvt. Ltd.