शहरी विकास मन्त्री प्रमु साहले बाढी प्रभावित क्षेत्रका जनताका लागि अस्थायी आवासको व्यवस्था तत्काल मिलाउन मातहतका निकायलाई निर्देशन दिएका छन् ।
तराईका विभिन्न जिल्लामा अाएको बाढीले गर्दा मानिसहरु घरविहिन भएका छन्। अावासको अभावमा जनता छटपटाईरहेका बेला मन्त्री साहले तत्काल अस्थायी आवासको व्यवस्था गर्न मातहतका निकायलाई निर्देशन दिएका हुन् । आइतबार बिहान सिंहदरबारस्थित आफ्नै कार्यकक्षमा बोलाएर उनले आवास महाशाखा अन्तरगतका कर्मचारीहरुलाई बाढी पीडितहरुको अवस्था बुझ्न स्थलगत निरीक्षणमा तत्काल जान पनि सचेत गराए ।
मन्त्री साहले विपदको यो बेला कुनै पनि कर्मचारीहरुलाई विदामा बस्ने छूट नभएको पनि बताए । उनले आवासको क्षेत्रमा काम गर्ने विभिन्न संघ, संस्था र निकायसँग बसेर एकीकृत कार्ययोजना बनाएर तुरुन्तै काम थाल्न पनि आग्रह गरे । मन्त्री साहले बाढी पीडित जनतालाई तत्काल आवासको व्यवस्था गर्ने कामलाई सरकारले पहिलो प्राथमिकतामा राखेको पनि स्पष्ट पारे ।
बैठकमा सहभागी मुख्य सचिव राजेन्द्रकिशोर क्षेत्रीले बाढी पीडितलाई आवासको व्यवस्था गर्दा गृह मन्त्रालयसँग आवश्यक समन्वय गर्न पनि कर्मचारीहरुलाई सचेत गराए ।
