सरकारले आइतबार बस्ने संसद बैठकमा संविधान संशोधन विधेयक अघि बढाउने भएको छ। प्रधानमन्त्री निवास बालुवाटारमा प्रधानमन्त्री र राजपाका शीर्षबीचको छलफलपछि संशोधन विधेयक निर्णयार्थ पेश गर्न राजपा तयार भएको बैठकमा सहभागी कांग्रेस नेता बिमलेन्द्र निधिले बताए।
स्थानीय तहको संख्या बढाउन अदालतले बाटो खोलेपछि राजपा सकारात्मक भएको हो। ‘आइतबारदेखि प्रक्रिया अगाडि बढ्छ, भोटिङमा जान्छ,’ निधिले भने।
बैठकमा राजपाका नेताहरूले संविधान संशोधन विधयेक मतदानका लागि संसदमा पेस गर्न प्रस्ताव गरेका थिए। उनीहरूकै प्रस्ताव अनुसार आइतबार बस्ने बैठकमा विधेयक पेश गर्न लागिएको हो।
राजपा अध्यक्ष मण्डलका नेता अनिल झाले अाइतबार संशोधन विधयेक मतदानका लागि संसदमा पेस हुने र मंगलबारसम्म यसको टुंगो लगाउन प्रयास गर्ने सरकारले प्रतिवद्धता व्यक्त गरेको बताए।
यसअघि संविधान संशोधनबिना चुनावमा जाने/नजानेमा राजपाको अध्यक्ष मण्डलमा रहेका नेताहरू विभाजित थिए।
अब सबै नेताहरू संविधान संशोधन विधयेकमा मतदान भए पास फेल जे भएपनि चुनाव जान तयार भएका हुन्।
बिहीबार सर्वोच्च अदालतले तराई/मधेसमा स्थानीय तह थप्न सरकारलाई बाटो खुला हुने गरी फैसला निर्णय गरेपछि राजपा नेताहरूले त्यसलाई सकारात्मक कदम बताएका थिए।
यसअघि हिजै राति राजपा नेता र भारतीय विदेशमन्त्री सुष्मा स्वराजबीच सामुहिक भेट भएको थियो। भेटमा संविधान संशोधन, आसन्न चुनाव लगायतका विषयमा कुराकानी भएको थियो
https://www.youtube.com/watch?v=45BtTroRpiI&feature=youtu.be