नेकपा (माओवादी केन्द्र)का अध्यक्ष पुष्पकमल दाहाल गत शुक्रबार अस्पताल भर्ना भएका नयाँ शक्ति पार्टीका संयोजक बाबुराम भट्टराईलाई भेट्न मध्यपुरथिमि, गठ्ठाघरस्थित नागरिक कम्युनिटी अस्पताल पुगेका छन् ।
भट्टराईको गत शुक्रबार प्रोष्टेट ग्ल्याण्ड मूत्रथैलीको शल्यक्रिया भएको थियो ।
आज अपराह्न भट्टराईको स्वास्थ्य अवस्था बुझ्न अस्पताल पुगेका दाहालले भट्टराई र अाफूबीच वर्तमान राजनीतिक परिवेशबारे गम्भीर छलफल भएको बताएका छन् । दाहालले अब छिट्टै एउटा नयाँ छलफलको प्रक्रिया प्रारम्भ हुने समेत बताए ।
शल्यक्रियामा संलग्न प्रा डा राकेश बर्मासँग करीब १५ मिनेट जानकारी लिएपछि दुवै नेताबीच करीब आधा घण्टा छुट्टै छलफल भएको थियो।करीब एक वर्षदेखि नियमित रुपमा भट्टराईको मूत्रथैलीको परीक्षण आफूले गरिरहेको बताउँदै प्रा डा बर्माले हाल पिसाबमा बढी खराबी आएका कारण शल्यक्रिया गरिएको बताए । शल्यक्रियापछि तीन दिनसम्म पिसाब नलीमा पाइप राखेर आज बिहान निकालिएको अस्पतालको मेट्रोन सुन्दरी जोशीले जानकारी दिईन् ।
डा भट्टराईको स्वास्थ्य अवस्थाबारे जानकारी लिन सोमबार राति सभामुख ओनसरी घर्ती पनि पुगेकी थिईन् । अस्पतालका निर्देशक श्रीभक्त कासिछ्वाले भट्टराईको उपचार भाेलिसम्म चल्ने र अपराह्न २ बजे घर फिर्ता पठाइने जानकारी दिए । रासस
