१० दिनभित्र प्रतिनिधि सभा निर्वाचनको मिति घोषणा गर्ने तयारीमा सरकार

फाइल फोटो


सरकारले १० दिनभित्रै प्रतिनिधि सभा निर्वाचनको मिति घोषणा गर्ने तयारी गरेको छ ।

प्रधानमन्त्री शेरबहादुर देउवाले आगामी भदौ १ गतेभित्र प्रतिनिधि सभा निर्वाचनको मिति घोषणा गरिसक्ने प्रतिबद्धता व्यक्त गरेका हुन् । सोमबार सिंहदरबारस्थित प्रधानमन्त्री तथा मन्त्रीपरिषद कार्यालयमा निर्वाचन आयोगका पदाधिकारीहरुसँगको सामूहिक भेटमा उनले अबको १० दिनभित्रै प्रतिनिधि सभा निर्वाचनको मिति घोषणा गर्ने तयारी भइरहेको जानकारी दिएका हुन् । भदौ १ गते भित्र प्रतिनिधि सभा निर्वाचनको मिति घोषणा गर्न प्रधानमन्त्री सहमत हुनु भएको प्रमुख निर्वाचन आयुक्त डा. अयोधिप्रसाद यादवले जानकारी दिए ।  त्यस अवसरमा निर्वाचन आयोगले प्रदेश सभा र प्रतिनिधि सभाका लागि निर्वाचन कानून र निर्वाचन क्षेत्र निर्धारणको काम छिटो सक्न पनि प्रधानमन्त्री देउवाको ध्यानाकर्षण गराएको थियो ।

निर्वाचन आयोगले आगामी मंसिर पहिलो हप्ताभित्रै प्रतिनिधि सभा निर्वाचन सम्पन्न हुनेगरी सरकार समक्ष कार्य योजनानै पेश गरेको छ । आगामी माघ ७ गतेभित्र आसन्न सबै तहको निर्वाचन सम्पन्न गर्नुपर्ने संवैधानिक दायित्व छ । सोही दायित्व पूरा गर्न पनि आयोगले सरकारलाई निर्वाचनको मिति घोषणा गर्ने काममा ढिलाई नगर्न पटक–पटक आग्रह गर्दै आएको छ ।

Share:

© 2017 Setopati Sanchar Pvt. Ltd.