काठमाडौं महानगरपालिकाले काठमाडौं उपत्यकाको सडक संरचनालाई व्यवस्थित बनाउने काममा समन्वयकारी भूमिका निर्वाह गर्ने प्रतिबद्धता व्यक्त गरेको छ ।
काठमाडौं महानगरपालिकाका मेयर विद्यासुन्दर शाक्यले सरोकारवाला निकायसँग समन्वय गरी उपत्यकाको सडक संरचना व्यवस्थित बनाउन लागि पर्ने प्रतिबद्धता व्यक्त गरेका हुन् । सोमबार सिंहदरबारमा बसेको व्यवस्थापिका संसद विकास समितिको बैठकमा बोल्दै उनले महानगर भित्रको ठूला सडक निर्माणको काममा सडक विभागले चासो नदिएपछि आफूहरुले नै निर्माण गरिदिएको जानकारी पनि दिए । मेयर शाक्यले सडक निर्माणका लागि महानगरपालिकाले बजेटको समेत व्यवस्था गरेको पनि स्मरण गराए ।
मेयर शाक्यले आफूहरुले निर्माण गरेपनि त्यसको भुक्तानी उपलब्ध गराउन भने अन्य सरकारी निकाय आफैँ तयार हुनुपर्ने पनि स्पष्ट पारे । उनले आपसी समन्वयको अभावमा उपत्यकाको सडक व्यवस्थापनको काममा कठिनाई हुने गरेको पनि उल्लेख गरे ।