जनताको सेवामा तत्पर नहुने कर्मचारीमाथि कडा कार्बाही हुन्छ-मन्त्री बस्नेत


सामान्य प्रशासन मन्त्री टेकबहादुर बस्नेतले जनताको सेवा गर्न तयार नहुने कर्मचारीमाथि कडा कार्बाही हुने चेतावनी दिएका छन् । सोमबार काठमाडौंमा आयोजित साक्षात्कार कार्यक्रममा उनले सो  कुरा बताएका हुन् ।

मन्त्री बस्नेतले जनताको सेवामा हाजिर हुन सबै कर्मचारी तयार हुने दाबी पनि गरे । कार्यक्रममा बोल्दै उनले दूर्गम भेगमा जाने कर्मचारीको सेवा, सुविधा बढाउन सरकार तयार रहेको पनि स्पष्ट पारे ।

मन्त्री बस्नेतले जतिसक्दो छिटो स्थानीय तहमा कर्मचारी व्यवस्थापन गर्ने प्रतिबद्धता व्यक्त गरे । उनले अन्तरिम व्यवस्था गरेर भएपनि स्थानीय तहमा कर्मचारी पठाउन सरकारले तयारी गरिरहेको पनि स्पष्ट पारे । स्थानीय तहमा कर्मचारीको अभाव भईरहेका बेला उनले अब तत्काल त्यसको व्यवस्थापन गर्न राजनीतिक सहमति जुटाउन सरकार लागि परेको पनि दाबी गरे । ‘कर्मचारी व्यवस्थापनका लागि संघीय पुनर्संरचना प्रशासनिक आयोगसँग आवश्यक परामर्श भइरहेको छ ।’ उनले भने ‘कर्मचारीहरुको अभावमा स्थानीय तहमा जनताले सास्ती व्यहोर्नु परेकोतर्फ सरकारको ध्यानाकर्षण भइरहेको छ ।’

उनले कर्मचारी प्रशासनभित्र राजनीति हुन नदिने प्रतिबद्धता व्यक्त गरेका छन् ।

Share:

© 2017 Setopati Sanchar Pvt. Ltd.