नेकपा एमाले स्थायी समितिको बैठक पार्टी मुख्यालय धुम्बाराहीमा बस्दैछ। आइतबार दिउँसो ४ बजे स्थायी समिति बैठक बोलाइएको सचिव प्रदीप ज्ञवालीले सेतोपाटीलाई जानकारी दिए।
उनका अनुसार आजको बैठकमा भरतपुरको चुनावको समिक्षा र २ नम्बर प्रदेशको चुनावको समीक्षा हुनेछ। भरतपुर महानगरपालिकाको मेयरमा जीत नजिक पुगेका एमाले उम्मेदवार देवी ज्ञवाली पुन:मतदानपछि पराजित भए।
माओवादी प्रतिनिधिले रणनीतिक रूपमा मतपत्र च्यातेपछि वडा नम्बर १९ मा निर्वाचन आयोगले पुन: मतदान गराएको थियो। पुन:मतदानपछि पुन: शुरु भएको मतगणनाको परिणाम हिजो सार्वजनिक भएको हो। एमालेका ज्ञवाली २०३ मतअन्तरले नेपाली कांग्रेसको समर्थन पाएकी माओवादी उम्मेदवार रेणु दाहालसँग पराजित भए।
बैठकमा २ नम्बर प्रदेशको चुनावी तयारी पनि महत्व पाउने छ। महासचिव ईश्वर पोखरेलको नेतृत्वमा मधेश गएका ८ नेताहरूको टोलीले आ-आफ्नो कार्यक्षेत्रमा परेको जिल्लामा पार्टीको वर्तमान अवस्थाबारे रिपोर्टिङ गर्नेछन्।
चुनावको तयारीका लागि पार्टीले गर्ने कार्यक्रमबारे पनि बैठकमा छलफल हुने ज्ञवालीले बताए। प्रदेश नम्बर दुईमा असोज २ गते स्थानीय तहको निर्वाचन हुँदैछ।
पार्टीले अन्य छ प्रदेशमा प्राप्त गरेको सफलतालाई कायम राख्दै स्थानीय तहमा सबैभन्दा धेरै सीट जित्ने पार्टी बन्ने एमालेको लक्ष्य छ। यस्तै, केही जिल्ला समन्वय समितिका अध्यक्ष र उपाध्यक्षको उम्मेद्वारको नाम पनि आजको बैठकले टुंगो लगाउने छ। पहिलो र दोस्रो चरणको निर्वाचन भएका अधिकांश जिल्लामा पार्टीका तर्फबाट उम्मेद्वारको टुंगो लगाएको एमालेले अब केही जिल्लाका उम्मेदवारबारे मात्रै निर्णय गर्न बाँकी छ। यसबाहेक निर्वाचन क्षेत्र निर्धारण आयोगको कामबारे पनि छलफल हुने सचिव ज्ञवालीले बताए।
