साझा प्रकाशनमा महाप्रबन्धकको मनोमानी, यसरी सार्वजनिक भयो उनको किताबी धन्दा

साझा प्रकाशनमा महाप्रबन्धकको मनोमानी, यसरी सार्वजनिक भयो उनको किताबी धन्दा


अवैध किताबलाई वैधानिकता दिने साझा प्रकाशनका महाप्रबन्धक डोलिन्द्र प्रसाद शर्माको प्रयास विफल भएको छ ।

साझा प्रकाशनले प्रकाशन गर्ने ‘सबैको नेपाली पुस्तक’ अनामनगरस्थित अल्पाईन अफसेटबाट साझा प्रकाशनको गाडीमा राखेर ल्याइएको किताब कर्मचारीले नियन्त्रणमा लिएपछि महाप्रबन्धक शर्माको किताबी धन्दा सार्वजनिक भएको हो । गाडीमा ल्याइएको ४ हजार ८ सय थान पुस्तकको मुद्रण मिति र मूल्य फरक छ । साझा प्रकाशनले २०७३ साल साउन १० गतेदेखि लागू हुने गरी सबैको नेपाली पुस्तकको मूल्य २ सय ९९ रुपैयाँ बनाएको थियो । त्यस अघि सो पुस्तकको मूल्य २ सय ४५ रुपैयाँ थियो । साझा प्रकाशनको सबैको नेपाली पुस्तक २०७२ सालमा छैटौं संस्करण हुँदा प्रति पुस्तक २ सय ४५ रुपैयाँ थियो ।

आइतबार कार्यालय परिसरमा ल्याइएको पुस्तक छैटौं संस्करण नै छ तर मूल्य २ सय ९९ राखेर छापिएको छ । यसैका आधारमा कर्मचारीले महाप्रबन्धकको किताबी धन्दा पत्ता लगाएका हुन् ।

जिल्ला- जिल्लाबाट फिर्ता भएका किताबको समेत मूल्य परिर्वतन गरेर २ सय ९९ बनाएर साझा प्रकाशनमा थन्काई करोडौं कमाउने खेलमा महाप्रबन्धक शर्मा लागेको भन्दै साझा प्रकाशनका कर्मचारी आक्रोशित बनेका छन् ।

कर्मचारीले महाप्रबन्धक शर्माले आफ्नो निजी छापाखानामा पुस्तक छापी धेरै कमिशन दिँदै आफैँ  विक्री वितरणमा संलग्न हुँदै आएको समेत दाबी गरेका छन् ।

यसैबीच किताबसहित गाडी नियन्त्रणमा लिएपछि महाप्रबन्धक शर्माले नियुक्त गरेका करारका कर्मचारी र स्थायी तथा पुराना कर्मचारीबीच सामान्य भनाभन चर्किदै गएर झडपको स्थितिमा पुगेको थियो ।

कर्मचारीले नियन्त्रणमा लिएको पुस्तक सहितको साझाको गाडी अहिले ललितपुर प्रहरीले नियन्त्रणमा लिएको छ । सबैको नेपाली पुस्तकको अहिले आठौँ संस्करण बजारमा आइसकेको छ । त्यसमा पहिलेको भन्दा वर्णविन्यास परिर्वतन गरेर ल्याइएको छ । पाठ्यक्रमको वर्णविन्यास परिर्वतन अनुसार परिर्वतन भइसकेकाले २०७२ र २०७३ को पुस्तक अहिले चल्दैन । तर महाप्रबन्धक शर्माले पुरानै किताब विक्री गर्न जिल्लास्थित साझा प्रकाशनका कर्मचारीलाई दबाब दिँदै आएको कर्मचारीले गुनासो गरेका छन् ।

यसैबीच साउन १ गते चलानी नम्बर १८ अनुसार चितवन पठाइएको १ हजार २ सय थान मेरो नेपाली किताबका केही पुस्तक फिर्ता भएको कर्मचारीले बताएका छन् । पुरानो मितिमा नयाँ शुल्क राखेर पठाइएको ती किताबको पाठ्यक्रम पनि भिन्न छन् ।

व्यवस्थापिका संसद अन्तरगतको सार्वजनिक लेखा समितिले शुक्रबार आर्थिक अनियमितता भएको भनिएको साझा प्रकाशनलाई ५ दिन भित्र सम्पूर्ण आर्थिक एवं प्रशासनिक विवरण समितिमा पेश गराउन निर्देशन दिएको थियो ।

प्रतिकृया दिनुहोस

© 2017 Setopati Sanchar Pvt. Ltd.