राष्ट्रिय जनमुक्ति पार्टी लिम्बुवान राज्य परिषद्ले आह्वान गरेको बन्दले अरुण पूर्वका नौ जिल्ला प्रभावित बनेको छ । बन्दका कारण अरुण पूर्वका जिल्लाहरूमा आइतबार बिहानैदेखि जनजीवन प्रभावित भएको छ ।
बन्दले पूर्वका पाँचथर, ताप्लेजुङ, तेह्रथुम, धनकुटा, संखुवासभा, इलाम, झापा, सुनसरी, मोरङ गरी ९ जिल्लामा यातायात र बजार पसल ठप्प रहेका छन् । प्रेस, कुटनीतिक नियोगका गाडी, दमकल र एम्वुलेन्सबाहेक कुनै पनि गाडी साधन चलेका छैनन् ।
बजार, पसल, शैक्षिक संस्था र कलकारखाना पनि बन्द छन् । साउन २२ गतेलाई कालो दिन मान्दै आएको राष्ट्रिय जनमुक्ति पार्टी लिम्बुवान राज्य परिषद्ले आइतबारका लागि नौ जिल्लामा बन्दको आह्वान गरेको हो । बन्दलाई लिम्बुवान क्रान्तिकारी पार्टीले पनि ऐक्यबद्धता जनाएको छ ।
विसं १८३१ साल साउन २२ गते कै दिन लिम्बुवानको तत्कालीन गोर्खासँग भएको नुनपानी सन्धिले आत्मनिर्णयको अधिकार खोसिएको भन्दै साउन २२ लाई परिषद्ले कालो दिनको रुपमा मनाउँदै आएको छ ।
