आपूर्तिमन्त्री शिवकुमार मण्डलले संविधान संशोधनको लागि सरकारले गम्भिर पहल गरिरहेको बताएका छन् । शुक्रबार राजधानीमा आयोजित एक कार्यक्रममा मन्त्री मण्डलले सो कुरा बताएका हुन् ।
कार्यक्रममा बोल्दै उनले भने,‘अघिल्लो सरकार अर्थात माओवादी केन्द्रका अध्यक्ष पुष्पकमल दाहाल नेतृत्वको सरकारले नै संशोधन प्रस्ताव ल्याएको हो, तर दुई तिहाई नपुगेकोले प्रस्ताव पारित हुन सकेन।’ उनले संशोधन अनिवार्य रहेकोले यसको लागि सरकारले इमानदार प्रयास गरिरहेको जनाए । उनले भने,‘सरकारले संशोधन प्रस्ताव पारित गराउनको लागि इमानदार प्रयास गरिरहेको छ, एमालेले पनि सहयोग र समर्थन गर्यो भने प्रदेश नम्बर २ को निर्वाचन अघि नै प्रस्ताव पारित हुन्छ, होइन भने संभावना छैन।’
उनले प्रदेश नम्बर २ को निर्वाचन अघि नै संशोधन प्रस्ताव पारित गराउनको लागि सरकारले प्रयत्न गर्ने विश्वास दिलाए । उनले असन्तुष्ट दलहरुलाई पनि निर्वाचनमा सहभागी हुन आग्रह गरे ।