पूर्वप्रधानमन्त्री एवम् नयाँ शक्ति नेपाल पार्टीका संयोजक बाबुराम भट्टराईको शुक्रबार प्रोस्टेट ग्रन्थीको अपरेसन गरिने भएको छ ।
लामो समयदेखि पिसाबसम्बन्धी समस्याले थलिएका भट्टराईको भक्तपुरको गठ्ठाघरस्थित नागरिक अस्पतालमा प्रोस्टेट ग्रन्थीको अपरेशन हुन लागेको उनका सहयोगी विश्वदीप पाण्डेले बताए। डा. राजेश बर्माको टोलीले शुक्रबार साँझ ४ बजे भट्टराईको अपरेसन गर्ने जनाइएको छ ।
प्रोस्टेट ग्रन्थी सुनिने समस्याले विगत एक वर्षदेखि भट्टराईले औषधि सेवन गरिरहेका थिए।
तर औषधिले पनि ग्रन्थी नघटेपछि आज अपरेसन गर्न लागिएका हुन्।
के हो प्रोष्टेट ग्रन्थिपुरुष जनेन्द्रिय प्रणालीको एउटा महत्त्वपूर्ण भाग प्रोस्टेट ग्रन्थि मांसपेशी, कोष र तन्तुहरूले बनेको हुन्छ । प्रोस्टेट ग्रन्थिलाई तीन खण्डमा विभाजन गर्न सकिन्छ । त्यसमध्ये सबैभन्दा ठूलो बाहिरी भाग । यो भागले प्रोस्टेटको करिब ७५ प्रतिशत ओगट्छ र यो भागमा प्रोस्टेट क्यान्सरको उत्पत्ति हुने गर्छ । मध्यभागले करिब २० प्रतिशत ठाउँ लिन्छ र वीर्य स्खलन नलीहरूको वरिपरि रहन्छ । सबैभन्दा सानो ५ प्रतिशतमात्र भाग ओगट्ने अन्तरकालीन भाग हो । यो भाग ३० वर्षको उमेरसम्म मात्र सानो हुन्छ । त्यसपछि प्रोस्टेट ग्रन्थि वृद्धि हुँदा यो भाग सक्रिय हुन्छ र यसले ९५ प्रतिशतसम्म ठाउँ लिन्छ । वृद्धिसँगै यो भागले अरू भागलाई थिचेर छेउतिर पुर्याउँछ । त्यो बाहेक मूत्र नलीको बीचको भागलाई यसले साँगुरो पार्दै लग्छ र मूत्र प्रवाहमा समस्या उत्पन्न गर्छ । मूत्र नलीको बाहिरी सतहमा रहेका ग्रन्थिहरू वृद्धि भएमा प्रोस्टेट ग्रन्थिको मध्यभाग बढ्छ र मूत्र नलीको बिर्कोजस्तो भइदिन्छ । मूत्र प्रवाहमा यो भागले सबैभन्दा नराम्रो असर गर्छ । यसले पिसाब पुरा निर्खन नदिने, थैलीको मांसपेशीलाई छिट्टै कमजोर अवस्थामा पुर्याउने, मूत्रबाहिनी नली र मृगौलालाई फुलाउने र मृगौलाको कार्यक्षमतामा नराम्रो प्रभाव पार्न सक्छ ।