मन्त्रालयहरुको गैरजिम्मेवारीपनले पुनर्निर्माणको कामले गति लिएन – पोखरेल


राष्ट्रिय पुनर्निर्माण प्राधिकरणका प्रमुख कार्यकारी अधिकृत गोविन्द्रप्रसाद पोखरेलले भूकम्पपछिको पुनर्निर्माणको कामले गति लिन नसक्नुमा मन्त्रालयहरु जिम्मेवार रहेको आरोप लगाएका छन् । बिहिबार व्यवस्थापिका संसदको सुशासन तथा अनुगमन समितिको बैठक उनले साे कुरा बताएका हुन् ।

समयमै पुनर्निर्माणको काम सम्पन्न गर्न नसक्दा  प्राधिकरणले चौतर्फी रुपमा अालाेचना खेप्दै अाइरहेकाे छ । तर, प्रमुख कार्यकारी अधिकृत पोखरेलले भने काममा ढिलाई हुनुमा आफूहरु नभई सम्बन्धित मन्त्रालयहरुनै जिम्मेवार रहेको प्रष्टिकरण दिएका छन् ।

प्रमुख कार्यकारी अधिकृत पोखरेलले पुनर्निर्माणको कामलाई गति दिनेगरी प्राधिकरणले आवश्यक समन्वय र सहजीकरणको काम गरिरहेको दाबी  समेत गरे । उनले  मन्त्रालयहरुलाई आ–आफ्ना क्षेत्र भित्रको पुनर्निर्माणको कामको जिम्मेवारी दिइएको पनि स्मरण गराए । उनले प्राधिकरणले सबै निकायसँग समन्वय गरेर आवश्यक बजेट, पुनर्निर्माणको मापदण्ड, खरीदका लागि आवश्यक  ऐनको व्यवस्था गरिदिएको पनि उल्लेख गरे ।

प्राधिकरणले निजी आवास पुनर्निर्माणको जिम्मेवारी सहरी विकास मन्त्रालय, अनुदान दिने व्यवस्था स्थानीय विकास मन्त्रालय, शिक्षण संस्थाहरुको पुनर्निर्माणको कामको जिम्मेवारी शिक्षा मन्त्रालय, स्वास्थ्य संस्थाहरुको पुनर्निर्माणको जिम्मेवारी स्वास्थ्य मन्त्रालयलाई दिएको दाबी गर्दै आएको छ । सम्बन्धित निकायसँग समन्वय गरेर अघि बढ्दा काममा केही ढिलाई हुनुलाई अन्यथा लिन नमिल्ने पनि प्राधिकरणका प्रमुख कार्यकारी अधिकृत पोखरेलको बुझाई छ । राष्ट्रिय पुनर्निर्माण प्राधिकरणले हालसम्म ४६ हजार ५ सय ४४ वटा निजी आवास निर्माणको काम सम्पन्न भएको पनि जनाएको छ । त्यसै गरी १ लाख १५ हजार ८४ वटा निजी आवास निर्माणको चरणमा रहेको पनि उल्लेख गरिएको छ ।

Share:

© 2017 Setopati Sanchar Pvt. Ltd.