सरकारी टोलीसँग हामीसँग वार्ता गर्ने कुनै म्यान्डेट नै छैन, आज पनि हामीले सोध्दा केही म्यान्डेट त छैन त्यै पनि बसौ न भनेकाले हामीले वार्तामा नजाने निर्णय गरेका हौ,’ डा सिंहले सेतोपाटीसँग भने,‘ केसी सरको स्वास्थ्यस्थिति बिग्रदै गएको छ हामी वार्तामा मात्र बस्ने कि उपलब्धि पनि लिने?, औपचारिकताका लागि हामी वार्ता गर्दैनौ।’
स्वास्थ्य शिक्षा र सेवामा सुधारका माग राखेर ११ पटक अनसन बसेका प्रा.डा.गोविन्द केसी पक्ष र सरकारबीच बुधबार हुने भनिएको वार्ता सरकारी पक्षले अल्झाउने र झारा टार्ने मात्रै काम गरेको भन्दै केसी पक्षले आजको वार्ता बहिष्कार गरेको छ।
सरकार र अनशनरत डा. गोविन्द केसीका प्रतिनिधिबीच यसअघि पटक पटक हुँदै आएको वार्तासमेत अनिर्णित भइरहेको बेला आज बस्ने भनेको छैठौं वार्ता केसी पक्षले बहिष्कार गरेको उनका प्रतिनिधि डा. अभिषेकराज सिंहले सेतोपाटीलाई बताए।
डा.केसी अनसनमा बसेको आज १०औं दिन भएकाले केसीको अवस्था दिनानुदिन खस्किएको छ।
डा.केसीको मुख्य माग चिकित्सा शिक्षा ऐनलाई आफूले दिएको सुझावअनुसार संसद्बाट पारित गर्नु पर्ने कुरामै वार्ता अडिइरहेको बताए ।
वार्ता अर्निणित भइरहेका बेला स्वास्थ्यमन्त्री गिरिराजमणि पोखरेलले चिकित्सा शिक्षा ऐनलाई माथेमा प्रतिवेदनको मूल भावनाअनुसार संसद्बाट पारित गराउन आफूहरु लागि परेको बताउँदै डा.केसीलाई हालको लागि अनसन स्थगन गर्न आह्वान गरेका थिए। पोखरेलले मंगलबार शिक्षामन्त्री गोपालमान श्रेष्ठ, संसद्को महिला बालबालिका, जेष्ठ नागरिक तथा समाजकल्याण समितिकी सभापति रन्जु झा, पूर्वस्वास्थ्यमन्त्री गगन थापा र मेडिकल काउन्सिलका पदाधिकारीसँग आफूले छलफल गरेर निकास निकाल्न गृहकार्य गरेको पनि बताए ।
यसैबीच त्रिवि शिक्षण अस्पतालका आवासीय चिकित्सकहरुले बुधबारदेखि पठनपाठनलगायत बहिरंग विभागको उपचार सेवामा सरिक नहुने जनाएका छन्। शिक्षण अस्पतालमा करिब ३ सय ५० जना आवासीय चिकित्सक छन्।
आवासीय चिकित्सकहरुको संगठन नेसनल रेजिडेन्ट डाक्टर्स एशोसिएसले प्रा.डा.गोविन्द केसीको आमरण अनसनको समर्थनमा सरकारलाई थप दबाब दिन शैक्षिक कार्यक्रमअन्तर्गत पठन पाठनमा सरिक नहुनको साथै बहिरंग विभागअन्तर्गत उपचार सेवामा सरिक नहुने जनाएको हो ।
आवासीय चिकित्सकहरुले डा.केसीका सबै माग गुणस्तरीय, सहज, सुलभ र सस्तो चिकित्सा शिक्षा र सेवालाई आमनेपालीको पहुँचमा पार्नेसँग सम्बन्धित भएकोले आफूहरु उनको सत्याग्रहको समर्थन गर्दै सरकारद्वारा छिटोभन्दा छिटो माग पूरा गराउन लागि परेको बताए ।
