नयाँ शक्ति पार्टी निकट ‘नयाँ शक्ति विद्यार्थी युनियन’को प्रथम राष्ट्रिय सम्मेलन काठमाडौंमा हुने भएको छ ।
आइतबार र सोमबार युनियनको काठमाडौंमा भएको सचिवालय बैठकले आगामी भदौं २३ देखि २५ सम्म सम्मेलन गर्ने निर्णय गरेको मङ्गलबार पत्रकारसम्मेलन गरी युनियनका राष्ट्रिय सम्मेलन आयोजक समितिका संयोजक रमेशकुमार महतोले जानकारी गराए । सम्मेलनले शिक्षाका विकृतिविरुद्ध आवाज उठाउने संयोजक महतोले बताए । ‘हाम्रो सम्मेलनले त्रिभुवन विश्वविद्यालय शैक्षिक सुधार गर्न र प्रभावकारी शैक्षिक मुद्दा उठाउने सवालमा केन्द्रीत हुन्छ’, उनले भने, ‘विश्वविद्यालयमा हुने दलीय भागबण्डालाई पनि अन्त्य गर्ने हाम्रो अभियान हुनेछ ।’
उनले सम्मेलनले दुई खालका शिक्षा नीतिलाई एउटै बनाउने अभियानसमेत सञ्चालन गर्ने दाबी गरे । करीब ८ सय प्रतिनिधिको सहभागिता रहने सम्मेलनबाट ९९ सदस्यीय नयाँ कार्यसमिति गठन गर्ने संयोजक महतोले बताए । उनले विधानमा छलफल गरेर पदाधिकारीको सङ्ख्याबारे टुङ्गो लगाउने जानकारी गराए । अहिले १२ हजार सदस्यता रहेको युनियनमा सम्मेलनसम्म २० हजार पु¥याउने लक्ष्य लिइएको छ । रासस
