प्रमुख प्रतिपक्षी दल नेकपा एमालेका नेता प्रकाश ज्वालाले प्रदेश र केन्द्रको निर्वाचन एकै चरणमा गर्नको लागि आफ्नो पार्टीको सहमति रहेको स्पष्ट पारेका छन् । आइतबार राजधानीमा आयोजित एक कार्यक्रममा नेता ज्वालाले सो कुरा बताएका हुन् । उनले भने, ‘समय थोरै छ, यसमा सरकारले खुट्टा कमाउनु हुँदैन, निर्वाचन आयोगलाई पूरा सहयोग गर्नुपर्छ, समयमै निर्वाचन नगरेर संसदको म्याद बढाउने गलत काममा लाग्नु हुँदैन ।’
नेता ज्वालाले दुवै निर्वाचन एकै चरणमा गर्दा राम्रो हुने उल्लेख गर्दै भने,‘दुवै निर्वाचन एकै चरणमा गर्दा राज्यको साधन र स्रोतको पनि बचत हुन्छ, चुनावकै लागि राज्यका शक्तिहरू पटक–पटक होमिनुपर्दैन ।’ एकै चरणमा दुई निर्वाचन गराउनको लागि सरकार र दलहरु तयार हुनुपर्नेमा उनको जोड थियो । त्यस्तै, उनले मधेशवादी दलहरुले पनि अब मोही माग्ने ढुँग्रो लुकाउने काम गर्न नहुने बताए । उनले थपे,‘उहाँहरुको दल दर्ता पनि हुने, कतिपय ठाउँमा स्वतन्त्र उम्मेद्धवार पनि उठानुपर्ने बाध्यता किन ? स्वस्थ प्रतिष्पर्धामा जाऔं, सबै सहभागी होऔँ।’
निर्वाचनसँग राजपाका मागहरू किन जोडिन्छन् भन्ने कुरा आफूले अहिलेसम्म पनि बुझ्न नसकेको भन्दै उनले आश्चर्य प्रकट गरे । ज्वालाले भने,‘संविधान कसैको एकलौटी घोषणापत्र जस्तो होइन, यसमा हाम्रा पनि थुप्रै असहमतिहरू छन्, उहाँहरुको पनि छन्, तर निर्वाचनमा जाने कुरा अरु विषयसँगको ‘बार्गेनिङ’ हुन सक्दैन्।’ उनले राजपालाई बच्चाहरुले दुध खानको लागि बच्चा रोएजस्तो गर्न छोडेर मुद्दामा बहस गर्न आग्रह समेत गरे ।
सरकारले सबै दलहरुलाई एक ठाउँमा भेला पारेर समस्या समाधानको लागि वातावरण बनाउनुपर्नेमा जोड दिँदै उनले भने,‘समस्या समाधानको लागि राउण्ड टेबलको आयोजना गर्नुपर्छ, यसको लागि सरकार गम्भिर बन्नुपर्छ, वातावरण बनाउनुपर्छ, निर्वाचन कुनैपनि शर्तमा बार्गेनिङ प्वाईण्ट हुन सक्दैन ।’