वाणिज्यमन्त्री मीन विश्वकर्माले प्रदेश र केन्द्रीय संसदको निर्वाचन एकै चरणमा गराउने गरी सरकार गृहकार्यमा जुटिसकेको बताएका छन् । आइतबार राजधानीमा आयोजित एक कार्यक्रममा मन्त्री विश्वकर्माले सो कुरा बताएका हुन् ।
उनले भने,‘सरकारले प्रदेश र केन्द्रीय संसदको निर्वाचन एकै चरणमा गराउने गरी छलफल शुरू गरिसकेको छ, यसमा प्रतिपक्षी दललगायत अन्य दलहरुले पनि सकारात्मक प्रतिक्रिया दिएका छन् ।’
त्यस्तै विश्वकर्माले दुवै निर्वाचन मंसिरको पहिलो अथवा दोस्रो हप्ता गर्ने गरी प्रधानमन्त्री शेरबहादुर देउवाले निर्वाचन आयोगका र दलहरुसँग छलफल गरिरहेको जानकारी दिए । उनले भने,‘प्रधानमन्त्रीको यस्तो प्रस्ताव र छलफलमा आयोग पनि सकारात्मक छ ।’ मन्त्री विश्वकर्माले दुवै निर्वाचन एकै चरणमा गर्न मिति घोषणा गर्नुपुर्व प्रमुख प्रतिपक्षी दल एमाले लगायत सत्ता साझेदार दलहरुको विश्वास लिन सरकार प्रयासरत रहेको बताए । एकै चरणमा दुई वटा निर्वाचन सम्पन्न गर्नको लागि आयोगको क्षमता अभिवृद्धि गर्न सरकार तयार रहेको विश्वकमाले बताए ।
उनले आयोगको क्षमता अभिवृद्धि गर्दा पनि जटिलता आए आफूहरू राजनीतिक सहमतिका माध्यमबाट निकास खोज्न तयार रहेको स्पष्ट पारे । उनले माघ ७ गतेभित्रै सबै निर्वाचन गर्नुपर्ने भएकोले सबै पक्षले यसको लागि सकारात्मक भूमिका खेल्नुपर्नेमा जोड दिए ।