रक्षामन्त्री भीमसेनदास प्रधानले काठमाडौं–निजगढ द्रुतमार्ग निर्माणको लागि चाहिने विष्फोटक पदार्थ भारतसँग लिने प्रक्रिया अघि बढिसकेको बताएका छन् । शुक्रबार राजधानीमा आयोजित एक कार्यक्रममा उनले साे कुरा बताएका हुन् ।
उनले भने,‘फाष्टट्रयाक निर्माण कार्य अगाडि बढाउनको लागि कुराकानी भैरहेको छ, नेपाली सेनाको आग्रह अनुसार नै उक्त निर्माण कार्य प्रारम्भ गर्न केही अत्याधुनिक कच्चा पदार्थ चाहिने भएकोले उक्त विष्फोटक पदार्थ भारतसँग लिनको लागि निर्णय प्रक्रिया अघि बढिसकेको छ, प्रधानमन्त्री शेरबहादुर देउवाजीको आगामी भदौंमा हुने भ्रमणमा पनि यसबारेमा कुराकानी हुनेछ, फाष्ट ट्रयाक निर्माणको लागि चाहिने आधारभूत कच्चा पदार्थका लागि प्रधानमन्त्रीले पनि थप कुरा राख्नुहुनेछ।’
उनले भने,‘काठमाडौं–निजगढ द्रुतमार्ग निर्माणका लागि आवश्यक विष्फोटक पदार्थ भारतबाट निर्यात गर्नुको विकल्प छैन, यो सामान भारतमात्रै पाउँछ, यसको लागि विशेष कुरा गर्न भारतका लागि नेपाली राजदूत दिपकुमार उपाध्यायजी काठमाडौंमै हुनुहुन्छ, छिट्टै यसबारेमा निश्कर्षमा पुग्छौं।’
उक्त निर्माणमा नेपाली सेना खटिएको छ ।
मुलुकका विकट क्षेत्रका सडक निर्माणमा नेपाली सेनाले गर्दै आएको कार्य मूल्याङकनका आधारमा राजधानीसँग तराई मधेशलाई जोड्ने छोटो दूरीको द्रुतमार्ग निर्माणको जिम्मेवारी सेनालाई दिएको बताउदैँ उनले नेपाली सेनाको सक्षम जनशक्ति, चेनअफ कमाण्ड, छोटो समयमा गुणस्तरीय पूर्वाधार निर्माणको अनुभवले द्रूतमार्गले तोकिएको समयावधि भित्रै पूर्णता पाउने विश्वास दिलाए ।
त्यस्तै, उनले सरकारले ७ वटै प्रदेश र उपत्यकामा समेत एक नेपाली सेनाको पृतनापति कार्यालय स्थापना भएको र सोही अनुसार पृत्तनापति समेत खटाईसकेको मन्त्री प्रधानले जानकारी दिए । उनले भने,‘संघीय संरचना अनुसार ७ वटै प्रदेशमा पृत्तना कार्यालय राखिएको हो, काठमाडौं उपत्यकामा भने छुट्टै पृतनापति कार्यालय रहनेछ ।’
सेनालाई पनि संघीय संरचनामा लैजाने उद्देश्य अनुसार नै सात प्रदेशमा सात र उपत्यकामा एक गरी आठ पृतना स्थापना गर्ने कार्यअघि बढिसकेको प्रधानले जानकारी दिए ।
