अबदेखि सर्वसाधारणले खाल्डाखुल्डीको सास्ती भोग्नुपर्दैन  ः भौतिक मन्त्री बलायर


भौतिक योजना तथा यातायातमन्त्री वीरबहादुर बलायरले अबदेखि सडकमा खाल्डाखुल्डीको सास्ती सर्वसाधारणले भोग्नु नपर्नेे बताएका छन् । शुक्रबार राजधानीमा आयोजित  एक कार्यक्रममा मन्त्री बलायरले सो कुरा बताएका हुन् ।

उनले भने,‘सडकका खाल्डाखुल्डीहरु पुर्नको लागि प्रधानमन्त्री शेरबहादुर देउवाजीले निर्देशन दिएपछि अहिले धमाधम काम भैरहेको छ, मैले पनि मन्त्रालयमा आउने वित्तिकै सम्बन्धित निकायलाई यस बारेमा निर्देशन दिइसकेको छु, खासमा भन्ने हो भने यो कामको लागि प्रधानमन्त्रीले निर्देशन दिइरहनुपर्ने थिएन, यो अत्यन्त दुःखदायी कुरा हो, कसले यो काम गर्ने हो भन्ने कुरा मलाई राम्रोसँग थाहा छ, निर्देशन दिइसकेको छु ।’

उनले मेलम्ची खानेपानी आयोजनाका कारणले काठमाडौंका सडकमा खाल्डाखुल्डी भएका र धुलाम्य भएको स्पष्ट पारे । उनले भने,‘अब यसको लागि पनि हामीले विकल्प सोचिसकेका छौं, ‘सेगमेन्टवाइज’ अनुसार काम भैरहेको छ, अहिले नै खाल्डाखुल्डी पुर्ने र यी समस्याहरु कसरी समाधान गर्ने भन्नेबारे गृहमन्त्रीसँग पनि छलफल भैरहेको छ ।’

मन्त्री बलायरले काठमाडौंमा देखिएका धुलो र टा«फिक जामको समस्या छिट्टै हल गर्ने समेत जनाए । उनले भने,‘अहिले काठमाडौंमा धेरै धुलोको समस्या छ, यसलाई हल गर्नको लागि हामी सम्बन्धित निकायका सबै अधिकारीहरु बसे छलफल गरेका छौं, त्यस्तै सडक जामको बारेमा पनि म हिजोमात्रै उक्त समस्या कसरी समाधान गर्न सकिन्छ भनेर स्थलगत निरीक्षणमा गएको थिएँ ।’ उनले आफू काम गर्नको लागि आएको उल्लेख गर्दै भने,‘मलाई कुनै चर्चा कमाउनु छैन, म सेलिब्रेटी बन्न आएको होइन ।’

 

Share:

© 2017 Setopati Sanchar Pvt. Ltd.