नेकपा एमालेका नेताहरू भोलिबाट क्रमश: २ नम्बर प्रदेश जाने भएका छन्।
केन्द्रीय सचिवालयले तोकेको जिम्मवारी अनुसार २ नम्बर प्रदेशमा स्थानीय निर्वाचनको तयारीका लागि नेताहरूले त्यता जाने तयारी थालेका हुन्।
पार्टी प्रचारविभाग उपप्रमुख सूर्य थापाले दिएको जानकारी अनुसार सबैभन्दा पहिले भोलि घनश्याम भूसाल रौतहट जाँदैछन्। यस्तै पर्सि विष्णु पौडेल बारा र गोकर्ण विष्ट सर्लाही जानेछन्।
त्यसपछि क्रमश: अरू नेताहरू पनि पार्टीले तोकेको कार्यक्षेत्रमा जाने थापाले सेतोपाटीलाई बताए। नेताहरू योगेश भट्टराई धनुषामा, भीम आचार्य सप्तरीमा, पृथ्वीसुब्बा गुरूङ महोत्तरीमा र प्रदीप ज्ञवाली सिराहामा खटिनेछन्।
यी सबैको नेतृत्व पर्सामा रहेका महासचिव ईश्वर पोखरेलले गर्ने छन्।
२ नम्बर प्रदेशका संयोजक सत्यनारायण मण्डल र सहसंयोजक नागेन्द्र चौधरीले पार्टीको प्रदेश कार्यालयबाट संयोजन र समन्वय गर्ने उपप्रमुख थापाले जानकारी दिए।
निर्वाचनको तयारीका क्रममा बर्दिवास, रौतहट र सर्लाहीलाई केन्द्रीत गरेर प्रदेश भरी निरन्तर गतिविधि सञ्चालन गरिने उनले बताए।
'२ नम्बर प्रदेशमा पनि एमाले नै पहिलो शक्ति हुने छ,' उनले भने, 'पार्टीलाई जिताउन निर्वाचन तयारीको नेतृत्व गर्ने जिम्मा सचिवालयका नेताहरूले गर्नुहुने छ। जिम्मेवारी पाउनुभएका नेताहरु केहीदिन भित्रै आफूलाई तोकिएको जिल्ला पुगिसक्नु हुनेछ।'
केही दिनअघि बसेको सचिवलाय बैठकले पार्टी महासचिव पोख्रेल, उपमहासचिवहरू र सचिवहरूको नेतृत्वमा दुई नम्बर प्रदेशमा चुनावी तयारी अघि बढाउने निर्णय गरेको जिम्मेवारी दिएको उनले बताए।
