राष्ट्रिय प्रजातन्त्र पार्टीले सरकारमा नजाने र प्रतिपक्षमा बस्ने औपचारिक निर्णय गरेको छ। आज बसेको पदाधिकारी बैठकबाट यस्तो निर्णय भएको प्रवक्ता राजाराम श्रेष्ठले सेतोपाटीलाई जानकारी दिए।
यो निर्णयसँगै अब सरकारमा जाने कि नजाने भन्ने अध्याय समाप्त भएको उनले बताए। उनले भने,'सरकारमा जाने कि नजाने भन्ने अध्याय अब समाप्त भएको छ। हामी यो सरकारमा जाँदैनौं।' सरकारमा जाने वा नजाने भन्ने विषयमा पार्टीभित्र विवाद थियो। पार्टी अध्यक्ष कमल थापा उपप्रधानमन्त्री दिए मात्रै राप्रपा सरकारमा जानु पर्ने पक्षमा थिए। तर नेता पशुपति शम्शेर राणा पक्षका नेताहरू भने उपप्रधानमन्त्री नदिए पनि सरकारमा जानु पर्ने पक्षमा थिए। 'यसअघिको केन्द्रीय समिति बैठकले पनि सम्मानजनक स्थान दिएमात्रै सरकारमा जाने निर्णय गरेको थियो,' प्रवक्ता श्रेष्ठले भने, 'सम्मानजनक स्थान नपाएपछि हामीले यसअघि नै वार्ता समिति भंग गरेका थियौं। आज औपचारिक रूपमा नै यो छलफल बन्द गरेर प्रतिपक्षमा बस्ने निर्णय गरेका हौं।'
आजको बैठकले आउने भदौ महीनाभित्रमा स्थानीय तह निर्वाचन भएका छवटै प्रदेशको अधिवेशन गर्ने पनि निर्णय गरेको छ। यी अधिवेशनसँगै राप्रपाको पार्टी संरचना संघीय ढाँचाको हुने उनले बताए। स्थानीय तहको निर्वाचन नभएको २ नम्बर प्रदेशमा भने निर्वाचन पछि अधिवेशन गरिने उनले बताए।
