छ दिन लामो तिब्बत भ्रमण सकेर एमाले अध्यक्ष केपी शर्मा ओली आज (शुक्रबार) स्वदेश फर्केका छन्।
कैलाश र मानसरोवर भ्रमणबाट फर्किएपछि अध्यक्ष ओलीले पत्रकार सम्मेलन गरी तिब्बतमा भएका भेटघाटका साथै भ्रमणको अनुभवबारे बताएका छन्। पत्रकार सम्मेलनमा उनले जोसुकै सरकारमा भएपनि नेपालको भूमि चीनविरूद्ध प्रयोग हुन नदिने कुरा चिनियाँ कम्युनिष्ट पार्टीका नेताहरूलाई बताएको जानकारी दिए।
‘मैले भनेको छु नेपालको साझा अवधारणा हो’, उनले भने, ‘जो सुकै सरकारमा भए पनि नेपालले एक चीन नीतिलाई समर्थन गर्ने छ। नेपालको भूमि चीन विरूद्ध प्रयोग हुन नदिने प्रयत्न नेपालले सधैं गर्नेछ। जो सुकै सरकारमा भएपनि नेपालको नीति यही हो।’
उनले तिब्बतको राजधानी ल्हासा र व्यापारिक सहर सिगात्सेको पनि भ्रमण गरेका थिए। अध्यक्ष ओली गत शनिबार श्रीमती राधा शाक्य, स्वकीय सचिव राजेश शाक्य र नीजि चिकित्सकसँग मानसरोवर भ्रमणमा गएका ओली पहिले ल्हासा गएका थिए। तिब्बत बसाईका क्रममा आफूले सिगात्सेको पनि भ्रमण गरेको उनले जानकारी दिए।
ऐतिहासिक र धार्मिक भ्रमणमा तिब्बत भ्रमण गर्ने गरिन्छ।
