काठमाडौंमा अस्थायी बसोबास भएका मतदाताले नामावलीमा नाम दर्ता गर्न आफ्नै जिल्ला जानुपर्ने बाध्यता निर्वाचन आयोगले हटाएको छ।
क्षेत्रीय निर्वाचन कार्यालय, काठमाडौंले उपत्यकाका मतदाताका लागि भोलिदेखि राष्ट्रिय सभागृहमा फोटोसहितको नामावली दर्ता गर्ने तयारी गरेको छ।
सभागृहमा १० वटा कम्प्युरमार्फत भोलिदेखि मतदाता नामावली दर्ता गर्ने तयारी भएको निर्वाचन आयोगका प्रवक्ता सुर्यप्रसाद शर्माले सेतोपाटीलाई जानकारी दिए। यहाँ फोटो खिच्न र नाम दर्ता गर्नका लागि आयोगमा अहिले २० जना कर्मचारीले प्रशिक्षण लिइरहेका छन्।
'यहाँ जुनसुकै जिल्लाका मतदाताले पनि आएर आफ्नो नाम दर्ता गर्न सक्छन्,' उनले भने, 'काठमाडौंमा बाहिर जिल्लाका मतदाता पनि धेरै बसोबास गर्ने भएकाले यहाँ यस्तो व्यवस्था गरेका हौं।'
काठमाडौंकै मतदाताले पनि यहाँ नाम दर्ता गर्ने पाउने छन्।
भोलिबाट शुरू हुने नामावली दर्ता प्रदेश सभा निर्वाचनको मिति घोषणा नभएसम्म खुला रहने उनले जानकारी दिए।
क्षेत्रीय निर्वाचन कार्यालयले जिल्ला विकास समितिको हलमा पनि क्षेत्रिय निर्वाचन कार्यालयमा पनि अहिले नाम दर्ता भइरहेको छ।
अहिले देशभरका ७५ वटै जिल्लाका निर्वाचन कार्यालयमा पनि नामावली दर्ता भइरहेको छ। जिल्ला निर्वाचन कार्यालयमा भने सम्बन्धित जिल्लाका मतदाताले मात्रै नाम लेखाउन सक्छन्। यी कार्यालयमा पनि प्रदेश सभा निर्वाचनको मिति घोषणा नभएसम्म दर्ता गर्ने क्रम जारी रहने छ।
निर्वाचन आयोग सम्बन्धि ऐनको व्यवस्था अनुसार नेपाल सरकारले निर्वाचनको मिति तोकेपछि भने नामावली संकलन कार्य रोक्नु पर्ने छ।
मतदाता नामावलीमा नाम दर्ता गर्नका लागि आयोगले ७ सयय ४४ वटै स्थानीय तहमा विशेष अभियान पनि चलाउँदै छ। यो अभियान अन्तर्गत साउन १६ गतेदेखि ३२ गतेसम्म प्रत्येक नगरपालिका वा गाउँपालिकाको केन्द्रमा नामावली दर्ता हुने छ। यो अभियानको तयारी अन्तिम चरणमा पुगेको प्रवक्ता शर्माले जानकारी दिए।
मतदाता नामावलीमा नाम लेखाउन आफ्नो नागरिकता लिएर सम्बन्धित व्यक्ति नै जानुपर्ने हुन्छ। यदी बसाइँसरी आएको ठाउँमा नाम दर्ता गर्ने हो भने नागरिकतासँगै बसाईँसराई दर्ताको प्रमाणपत्र पनि लैजानु पर्छ। नामावलीमा राखिने फोटो भने नाम दर्ता गर्न बसेका कर्मचारीले नै खिचिदिन्छन्।
