चिनियाँ ठेकेदारलाई प्राधिकरणको चेतावनी पत्र


ढल्केबर सबस्टेशनको काम बन्द गरेको चिनियाँ ठेकेदारलाई नेपाल विद्युत प्राधिकरणले ठेक्का रद्ध गर्ने चेतावनी दिएको छ।

२२० केभीको ढल्केबर सबस्टेशन बनाउने जिम्मा पाएको सेन्ट्रल चाइना पावर ग्रिड इन्टरनेशनलले कम्पनी (सिसिपिजी) लाई प्राधिकरणले आइतबार ‘नोटिस टु करेक्ट’ चिठी पठाएको छ। ‘हामीले चिठी पठाइसकेका छौं, कामलाई निरन्तरता नदिए ठेक्का पनि रद्ध हुनसक्ने चेतावनी दिएका छौं,’ सबस्टेशन परियोजना प्रमुख राधेशरण महतोले भने, ‘भरतपुर–बर्दघाट प्रसारण लाइनको ठेक्का तोडेको कुरालाई यो योजनासँग नजोड्नु भनेर चिठी लेखिदिएका छौं।’

सिसिपिजीले नै ठेक्का पाएको भरतपुर–बर्दघाट प्रसारण लाइनमा उसको काम चित्त नबुझेपछि प्राधिकरणले उसँगको ठेक्का रद्ध गरेको थियो।

त्यसको प्रतिशोधमा ठेकेदार कम्पनीले ढल्केबर सबस्टेसन काम रोकेको महतोले बताए।

तीन वर्षअघि सिसिपिजीले हेटौंडा, ढल्केबर र इनरुवामा २२० केभीका सवस्टेशन बनाउने ठेक्का पाएको थियो। तीमध्ये दुई सवस्टेशनको काम अघि बढेको छैन, भने ढल्केबरमा करिब ९० प्रतिशत काम सकिएको छ। ‘सुरुमा १८ महिनामा सक्ने भनेर ठेक्का पाएको हो तीन वर्ष भइसक्दा पनि उसले काम गर्न सकेको छैन,’ महतोले भने, महतोले भने, ‘अहिले पनि हामीले अक्टोबरसम्म काम सक भनेका थियौं तर उनीहरु काम रोकेर बसेका छन्, यस्तै अवस्था भए ठेक्का रद्ध हुन्छ।’

ढल्केबर सवस्टेशन भारतबाट थप बिजुली आयात गर्नका लागि महत्वपूर्ण पूर्वाधार हो। मुजप्फपुर–ढल्केबर अन्तरदेशीय प्रसारण लाइनबाट अहिले ढल्केबर हुँदै १०० मेगावाट बिजुली आयात भइरहेको छ। गत हिउँदमा यो प्रसारण लाइनबाट १४० मेगावाटसम्म बिजुली आयात भएको थियो। यो हिउँदमा सवस्टेशन बनाएर २०० मेगावाट बिजुली भारतबाट आयात गर्ने प्राधिकरणको योजना छ।

ठेकेदारले काम रोकेपछि त्यो योजनामा चुनौती थपिएको प्राधिकरणले जनाएको छ।

Share:

© 2017 Setopati Sanchar Pvt. Ltd.