राष्ट्रिय प्रजातन्त्र पार्टीले मतपत्रबाट जोडी गोरू निर्वाचन चिन्ह हटाउन निर्वाचन आयोगसँग माग गरेको छ। जोडी गोरू चुनाव चिन्ह लिएर कोही पनि निर्वाचन नलडेको तर मतपत्रमा रहेकोले आफ्ना पार्टीका मतदाता झुक्कीएको राप्रपाको भनाई छ।
राप्रपाको चुनाव चिन्ह गाई जस्तै समान देखिने भएकोले आफ्नो पार्टीका हजारौ मत बदर भएको भन्दै राप्रपा केन्द्रीय कमिटिको बैठकले जोडी गोरू हटाउन माग गरेको पार्टी अध्यक्ष कमल थापाले बताए।
जोडी गोरू तराई मधेस लोकतान्त्रिक पार्टीको चुनाव चिन्ह हो। तराई मधेस लोकतान्त्रिक पार्टीसहित अन्य ५ वटा पार्टी मिलेर राष्ट्रिय जनता पार्टीको गठन भएकोले अहिले तमलोपा पार्टी छैन। संसदमा यो पार्टीका नामबाट सांसदहरु रहेकोले निर्वाचन आयोगले भने मतपत्रमा चुनाव चिन्ह राखेको थियो। राजपाले दुवै चरणको निर्वाचन बहिष्कार गरेको थियो।
राप्रपा केन्द्रीय कमिटिको बैठकले नेपालको नोटमा पृथ्वीनारायण शाहको तस्विर अंकित गर्न समेत माग गरेको छ । राप्रपाले पृथ्वीनारायण शाहलाई नेपालको एकताको प्रतिकको रुमपा राष्ट्रिय रुपमा नै सम्मान दिनुपर्ने माग राख्दै आएको छ।