धनगढी प्रमुखको प्राथमिकताः स्मार्ट सिटीको प्रकृया अगाडि बढाउने


कैलालीको धनगढी उप–महानगरपालिकाका नवनिर्वाचित प्रमुख नृपबहादुर वडले धनगढीलाई ‘स्मार्ट सिटी’ बनाउन आफूले प्रकृया अगाडि बढाउने बताएका छन्। नगर प्रमुखमा निर्वाचित भएपछि सेतोपाटीसँग कुरा गर्दै उनले स्मार्ट सिटीको योजनालाई आफूले प्राथमिकतामा राख्ने बताए।

प्रमुख वडले धनगढीको डुवान समस्याको समाधान गर्नु, कटान नियन्त्रण तथा सबै ठाउँमा खानेपानीको सुविधा पुर्‍याउनु आफ्नो पहिलो प्राथमिकता रहेको बताए। ‘डुवान धनगढीको मुख्य समस्याको रुपमा रहेको छ। डुवान समस्याको तत्काल समाधानको पहल गर्छु,’ उनले भने–‘धनगढीमा १९ वडामध्ये १५–१६ वडामा कटानको समस्या छ। कटान नियन्त्रणका लागि तटबन्ध निर्माणका योजना अगाडि बढाउँछु।’

उनले जनतालाई राहत र सुविधा दिने योजनाहरु बाटोघाटो निर्माण, खानेपानी विस्तार र व्यवस्थापनजस्ता कार्य तत्काल शुरु गर्ने बताए। वडले बजारदेखि टाढा रहेका नगरका ग्रामीण क्षेत्रहरुमा स्वास्थ्य सुविधा पुर्‍याउने बताए। ऐलानी जग्गाको लालपुर्जा वितरणका लागि आवश्यक प्रकृया तत्काल सुरु गर्ने उनको भनाई छ ।

यस्तै धनगढीका पर्यटकीय क्षेत्रको विकासका लागि पनि आफूले ध्यान दिने उनले बताए। नवनिर्वाचित नगर प्रमुख वडले भने,‘धनगढीमा बेहडाबाबा, जाखोरताल, शिवपुरी धामजस्ता पर्यटकिय क्षेत्र छन्। तिनको विकासका लागि सरोकारवालासँग बसेर योजना निर्माण गर्नेछु।’

धनगढीमा कुनै पनि योजना विना विकास भईरहेको उल्लेख गर्दै वडले नगरको गुरुयोजना बनाएर नगरलाई व्यवस्थित बनाउने प्रकृया शुरु गर्ने बताए। ‘नगरका सबै समस्यासंग म जानकार छु । नगरका हेरक बस्तीमा म पुगेको छु।’ उनले भने, ‘हिजो पदीय जिम्मेवारीमा थिएन । अब निर्णय गर्ने ठाउँमा पुगेको छु । नगरका समस्या समाधानको बाटोतिर लैजाने छु ।’

नवनिर्वाचित प्रमुख वडले नगरपालिकामा सुशासन कायम राख्ने र भ्रष्टाचार अन्त्य गर्ने बताए । उनले नगरको विकासका लागि सबै दलहरुसंग आवश्यक समन्वय गरिने बताए । नगरको विकासका लागि अहिलेको बजेटले केही पनि नहुने भन्दै उनले बजेट ल्याउनका लागि पनि आफूले पहल गर्ने बताएका छन्।

‘जनताले केही काम गर्नसक्छ भन्ने विश्वास गरेर मलाई विजयी गराएका छन्। म जनताले दिएको भोट खेर जान दिने छैन ।’ वडले भने–‘पाँच वर्षपछि हुने निर्वाचनमा पुनः नृप वडलाई नै नगर प्रमुखमा निर्वाचित गराउनु पर्छ भनेर जनताले दवाव दिने काम गर्नेछु ।’

Share:

प्रतिकृया दिनुहोस

© 2017 Setopati Sanchar Pvt. Ltd.