आइतबारदेखि सम्बन्धित मन्त्रीले विनियोजन विधेयकमाथिका सवालमा जवाफ दिने


व्यवस्थापिका– संसद्को बैठकमा विनियोजन विधेयक, २०७४ अन्तरगत  विभिन्न मन्त्रालय र संवैधानिक निकायका शीर्षकमाथि सांसद्हरुले बोल्ने क्रम शुक्रबार सकिएको छ । संसद्को यही असार २५ र २६ गतेका दिन बस्ने बैठकमा मन्त्रीहरुको जवाफका लागि समय तोकिएको छ ।

आजको बैठकमा नौ मन्त्रालय र छ संवैधानिक निकायका शीर्षकमाथि छलफल भएको थियो । विज्ञान तथा प्रविधि, शान्ति तथा पुनर्निर्माण, संस्कृति पर्यटन तथा नागरिक उड्डयन, सहकारी तथा गरिबी निवारण, सिंँचाइ, सूचना तथा सञ्चार, स्वास्थ्य मन्त्रालय, प्रधानमन्त्री तथा मन्त्रिपरिषद्को कार्यालयका साथै राष्ट्रिय योजना आयोगको सचिवालय, राष्ट्रपतिको कार्यालय र उपराष्ट्रपतिको कार्यालयका विभिन्न शीर्षकमाथि छलफल भएको हो ।

छलफलमा सांसद्हरुले नेपालको प्राकृतिक स्रोत तथा साधनको उपयोग हुनेगरी बजेट आउनुपर्नेमा जोड दिएका थिए । उनीहरुले बजेट विनियोजन र खर्च प्रणाली परम्परागत भएकामा चिन्ता व्यक्त गरे ।

नेपाली काँग्रेसका भीमसेनदास प्रधान, शारदा पौडेल, नेकपा (एमाले)का भीम आचार्य, पशुपति चौलागाईं, राष्ट्रिय प्रजातन्त्र पार्टीका कान्ता भट्टराई, नेकपा (माओवादी केन्द्र)का हितराज पाण्डे, अन्य सांसद विमल केडिया, डा वंशीधर मिश्र, गीता वाग्ले, वैजनाथ चौधरी, भुटनदेवी खवास, कमला दोङ, लालबहादुर गुरुङ, सीता गिरी (ओली), शिवचन्द्र चौधरी, मुफ्ताव अहमत, नवराज शर्मा, कृष्णप्रसाद पौडेल, श्यामप्रसाद ढकाल, तेजूलाल चौधरीलगायतले छलफलमा भाग लिएका थिए ।

संसद्को अर्काे बैठक यही असार २५ गते आइतबार बिहान ११ बजे बस्नेछ । रासस

Share:

प्रतिकृया दिनुहोस

© 2017 Setopati Sanchar Pvt. Ltd.