देउवालाई दिएको समर्थन फिर्ता नलिन र दल दर्ता गर्न राजपालाई भारतीय राजदूतको सुझाव

लैनचौरमा झन्डै २ घन्टा छलफल


 राष्ट्रिय जनता पार्टी नेपाल(राजपा)का नेताहरूले झण्डै दुई घण्टा भारतीय राजदूतसँग छलफल गरेका छन्। भारतीय राजदूतलाई भेट्न  राजपाको अध्यक्ष मण्डलका महन्थ ठाकुर, राजेन्द्र महतो, शरतसिंह भण्डारी, महेन्द्र राय यादव, अनिल झा र राजकिशोर यादव  मंगलबार साँझ लैनचौरस्थित दूतावास पुगेका थिए।

दूतावासमा साँझ पाँच बजेदेखि झन्डै सात बजेसम्म छलफल भएको राजपा स्रोतले बतायो।

भेटमा भारतीय राजदूत मन्जिवसिंह पुरीले तेस्रो चरणको निर्वाचनको लागि दल दर्ता गर्न अाग्रह गरेका थिए।  छलफलमा देउवा सरकारलाई दिएको समर्थन फिर्ता नगर्न समेत राजदूत पुरीले सुझाव दिएको राजपा स्रोतले बतायो।

भारतीय राजदूतसँगको  छलफलपछि राजपा नेताहरू दुईचार दिनमात्रै दल दर्ता गर्ने मनस्थितिमा पुगेको राजपाका एक नेताले सेतोपाटीलाई बताए।

अाजै दूतावास जानुअघि राजपा अध्यक्ष मण्डलका संयोजक महन्थ ठाकुर र प्रधानमन्त्री शेरबहादुर देउवाबीच बालुवाटारमा ‘वान टु वान’ वार्ता भएको थियो।

प्रधानमन्त्री देउवासँगको भेटमा ठाकुरले संविधान संशोधन नभए सरकारलाई दिएको समर्थन फिर्ता लिने चेतावनी दिएका थिए।

 राजपा नेताहरूले असोज २ गते तोकिएको तेस्रो चरणको स्थानीय निर्वाचनका लागि निर्वाचन अायोगमा दल दर्ता गर्ने तयारी गरिरहेका छन्।

Share:

© 2017 Setopati Sanchar Pvt. Ltd.