कपिलवस्तु नगरपालिकामा कांग्रेस अगाडि, कहिले आउँछ परिणाम?


प्रदेश नं ५ को कपिलवस्तु नगरपालिकामा भोलि बिहान मात्र मतपरिणाम सार्वजनिक हुने भएको छ। कपिलवस्तु नगरपालिकाका निर्वाचन अधिकृत विश्वमंगल आत्रेयले अझै चार वटा वडाको १० हजार बढी मत गन्न बाँकी रहेकाले मतपरिणाम भोलि बिहान मात्र आउने बताए।

कपिलवस्तु नगरपालिकामा स्वतन्त्र उम्मेद्वार र कांग्रेसबीच प्रतिष्पर्धा छ। स्वतन्त्र उम्मेद्वारी र चुनाव चिन्ह तल र माथि रहेकाले प्रत्येक मतपत्रको गणनामा ढिलाई भइरहेको आत्रेयले बताए।

‘सुरूवातमा केही वडाहरुमा गणना गर्दा सानासाना विवाद पनि आए अहिले हामीले गति बढाएका छौँ। निर्वाचन आयोगले हामीलाई आजसम्म २६ हजार मत गन्न भनेको थियो। कपिलवस्तुमा २८ हजार मत खसेको छ। हामी आयोगले दिएको फ्रेममा छौँ। भोलि मतपरिणाम आउँछ’, आत्रेयले भने।

कपिलवस्तु नगरपालिकामा कांग्रेसका मेयर उम्मेद्वार किरण सिंह ६५४८ मतका साथ अगाडि छन्। दोश्रोमा स्वतन्त्र उम्मेद्वारी दिएका राष्ट्रिय जनता पार्टीका रामदास गुप्ता छन्। उनले ‘जर्किन’ चुनाव चिन्हमा ४७५६ मत ल्याएर पछ्याइरहेका छन्।

उपमेयरमा पनि कांग्रेसकी उम्मेद्वार अगाडि छिन्। लक्ष्मी कसौधनले ६५४८ मत ल्याएर अग्रता हासिल गरिरहेकी छिन्। उनलाई स्वतन्त्र उम्मेद्वारी दिएका राजपाका बासुदेव प्रसाद कसौधनले २७७१ मत ल्याएर पछ्याइरहेका छन्। उनले चुनाव चिन्ह ढोकामा लगाउने चुकुल ‘छेस्किनी’ पाएका थिए।

संघीय समाजवादी फोरम कपिलवस्तु नगरपालिकामा तेश्रो स्थानमा छ। उसका मेयर उम्मेद्वारले १७६४ मत ल्याएका छन्। एमालेका मेयर उम्मेद्वार रउफ अहमत खाँ ले १३३० मत पाएका छन्।

Share:

© 2017 Setopati Sanchar Pvt. Ltd.