धरानमा बबाल, मतगणनामा खटिएका कर्मचारीले एमालेलाई सघाएको आरोप


मत गणनामा खटिएका कर्मचारीले मत गणनापछिको नतिजा राम्रोसँग राख्न नसकेपछि धरान उप–महानगरपालिकामा विवाद उब्जिएको छ। यही विवादका कारण राति ११ बजेदेखि मत गणना अवरुद्ध छ।

मत गणनाको नतिजा फारममा सार्ने क्रममा गल्ती भएपछि माओवादी केन्द्रका कार्यकर्ताहरुले विरोध गर्दै तत्कालै मत गणना रोक्न लगाएका थिए। माओवादीले निर्वाचन अधिकारीकै मिलेमतोमा नेकपा एमालेलाई जिताउन खोजिएको भन्दै यसको विरोध गरेको छ।

मतगणना रोकिदा एमाले ७ हजार ८२ मत प्राप्त गर्दै अग्रस्थानमा छ। नेपाली कांग्रेसको ५ हजार ८ सय ८२ मत छ भने माओवादीले ३ हजार ४ सय ३५ मत प्राप्त गरेको थियो।

केही समयभित्र सहमति नबने स्थगित मतगणना भोलिदेखी मात्र सुचारु हुने मुख्य निर्वाचन अधिकृत जयप्रसाद महतले सेतोपाटीलाई जानकारी दिए।

‘हामी कहाँ २ वटा फारम हुन्छ। पहिलो फारम, गणनाका बेला कुन दलले कति मत प्राप्त गर्‍यो भनेर टिप्ने र दोस्रो फारम, मत गणना सार्वजनिक गर्नका लागि टिपिने,’ महतले भने–‘पहिलो फारमबाट दोस्रो फारममा मत टिप्ने क्रममा भूलबस अर्कोमा परेछ। हामीले रूजु गर्नेबेला त्यो थाहा पायौं। यसलाई सच्चाउन लागिरहेको बेला बाहिर खबर पुगिसकेछ। त्यसपछि राजनीतिक दलका पदाधिकारीले हुँदैन भन्दै आउनु भयो।’

महतले नियतवस नभई प्राविधिक कारणले गल्ती भएको दावी गरे। ‘हामीले सबैलाई बोलाएर कुरा राख्ने भनेका छौं। राति बैठक बस्यो भने गणना सुचारु हुन्छ। नभए भोलि मात्र सम्भव होला,’ उनले भने। हालसम्म ८ वटा वडाको मतगणना भइसकेको छ।

Share:

प्रतिकृया दिनुहोस

© 2017 Setopati Sanchar Pvt. Ltd.