नेकपा एमालेका सचिव शेरधन राईले पार्टीको आन्तरिक जीवन पुनर्गठनको सुझाव प्रस्तुत गर्न कार्यदल बनाउन प्रस्ताव राखेका छन्।
आइतबारको सचिवालय बैठकमा अध्यक्ष केपी शर्मा ओलीले प्रस्तुत गरेको कार्यविभाजन प्रस्तावमाथि धारणा राख्ने क्रममा उनले उक्त कार्यदलले सचिवालयमा सुझाव पेस गर्ने र निष्कर्षका आधारमा अघि बढ्नुपर्ने बताएका हुन्।
'गत निर्वाचनमा पार्टीले नराम्ररी धक्का खाएपश्चात् पार्टी पंक्तिमा देखा परेको निराशा, अन्यौल र विचलनको अवस्थालाई चिर्दै पार्टीलाई नयाँ ढंगले अगाडि बढाउनका लागि पार्टीको आन्तरिक जीवनलाई पुनर्गठन गर्न सुझाव तथा प्रतिवेदन सचिवालयमा पेस गर्न कार्यदल गठन गर्नुपर्छ,' सचिवालयमा उनले राखेको प्रस्ताव उद्धृत गर्दै एक नेताले बताए।
उनले निर्वाचनको समीक्षा निर्मम ढंगले गर्नुपर्ने बताएका छन्। पराजय व्यर्होनुका बाह्य र आन्तरिक कारणहरू किटान गरेर समीक्षा गर्नुपर्ने पनि उनले बताएका थिए।
'कमीहरूलाई गहिरो रूपमा महसुस गर्दै आगामी दिनमा सच्चिने प्रण गर्नुपर्छ,' उनले भनेका थिए।
राष्ट्रिय राजनीतिलाई दिशाबोध गर्न तथा उपस्थित चुनौतीहरूलाई सामना गर्न सक्ने र आगामी कार्यभार पूरा गर्नेगरी पार्टीलाई प्रस्तुत गर्नुपर्ने पनि उनले धारणा राखेका थिए।
आज राईसहित चार जना सचिवहरूले धारणा राखेका थिए।
