नेकपा एमाले विशेष महाधिवेशन पक्षधर युवाले बहसका लागि दस्तावेज अघि सारेका छन्।
नेकपा स्थापनाको ७७ औं वर्षगाँठका सन्दर्भ पारेर उनीहरूले १५ वटा नीतिगत सुधारको प्रस्तावसहित दस्तावेज अघि बढाएका हुन्।
‘जसको उद्देश्य पार्टीलाई थप लोकतान्त्रिक, उत्तरदायी, जनमुखी र प्रभावकारी बनाउनु हो। यस छलफल पत्रमा हामीले आज पार्टीको पुनर्जागरणका लागि आवश्यक पर्ने न्यूनतम नीतिगत सुधारहरूमा मात्र केन्द्रीत भएका छौं र उक्त नीतिहरूको आवश्यकताबारे आधारभूत तर्कहरू मात्र पेश गरेका छौं। तसर्थ, यसमा हामी गहन वैचारिक र राजनीतिक मन्थनमा प्रवेश नगरेता पनि प्रस्तावित आधार र नीतिहरू जनताको बहुदलीय जनवाद (जबज) र लोकतन्त्रका आधारभूत मूल्यमान्यतामा आधारित छन्। आधुनिक चीनका निर्माता कमरेड देङ सायो पिङले भनेझैं मनलाई मुक्त गर्दै, तथ्यहरूबाट सत्य खोज्ने प्रयत्न गर्नु नेकपा (एमाले) का प्रत्यक सदस्यको कर्तव्य हो,’ दस्तावेजमा उल्लेख छ।
यो छलफलका लागि मात्र छलफल नभइ एमाले पार्टी र आन्दोलनको पुनर्जागरणको लागि अपिरहार्य आवश्यकता रहेको उनीहरूको तर्क छ।
‘नेक्सटजेन एमाले– जनतातर्फ, जरातर्फ’ नाम दिएको दस्तावेजमा पार्टी पुनर्गठनको पहिलो आधार रूपान्तरणसहितको पुस्तान्तरणलाई बनाइएको छ।
‘अबको एमाले राजनीतिक, वैचारिक र सांगठनिक रुपमा नेक्टजेन एमाले हुनुपर्छ अर्थात रूपान्तरणसहित पुस्तान्तरित हुनुपर्छ। यो पुस्तान्तरण केवल एउटा व्यक्तिको ठाउँमा अर्को व्यक्ति आउने अथवा एउटा उमेर समूहको ठाउँमा अर्को उमेर समूह आउदैमा हुदैन । यो पुस्तान्तरण त पार्टीको समग्र राजनीतिक, वैचारिक र सांगठनिक स्वरुपमा प्रतिविम्बित हुनुपर्दछ । अब हाम्रो वैचारिक धरातल, राजनीतिक कार्यक्रम र सांगठनिक संरचनाले अहिलेका चुनौतीहरुको सामना गर्न सक्नुपर्छ, जनआकांक्षा र जनअपेक्षालाई सम्बोधन गर्न सक्नुपर्छ। तसर्थ अबको एमाले सम्पूर्ण ढंगले परिष्कृत र अद्यावधिक भएको नेक्स्टजेन एमाले हुनुपर्दछ जसका लागि आवश्यक नीतिगत सुधारहरु अगाडि प्रस्ताव गरिएका छन्,’ दस्तावेजमा भनिएको छ।
दोस्रो प्रस्तावका रूपमा उनीहरूले माफी माग्दै जनतातर्फ फर्किनुपर्ने बताएका छन्।
‘अब एमालेले विगतका आफ्ना सबै कमीकमजोरीप्रति माफी माग्दै जनतातर्फ फर्किनपर्छ। अब कुनै पनिबहानाबाजीमा जनमतलाई इन्कार गर्ने दुष्प्रयत्न र गलत व्याख्या विश्लेषण गर्नहुदैन । अरु कसैलाई दोष लगाएर फागुन २१ मा अभिव्यक्त भएको जनमतलाई नजरअन्दाज गर्नु जबजको घोर अपमान हो,’ उनीहरूको तर्क छ।
एमालेको जनसंगठन बुद्धिजीवी परिषद्का अध्यक्ष गजेन्द्र थपलिया, युवा संघका उपमहासचिव उपेन्द्र शाही, अनेरास्ववियका उपमहासचिव कमल जोशीले यो अभियान सुरू गरेका हुन्। उनीहरूले दस्तावेजसहित राष्ट्रिय महाधिवेशन प्रतिनिधि परिषद् सदस्यहरूको हस्ताक्षर गराइरहेका छन्।
-1746009348.jpg)
