सन् १९७९ को इस्लामिक क्रान्तिपछि संयुक्त राज्य अमेरिका र इरानका उच्च अधिकारीहरूबीच पहिलो पटक प्रत्यक्ष 'फेस–टु–फेस' (आमनेसामने) वार्ता भएको छ।
पाकिस्तानको राजधानी इस्लामावादमा भएको युद्धविराम सम्बन्धी ऐतिहासिक वार्ताको पहिलो चरण सम्पन्न भएको छ।
अन्तर्राष्ट्रिय सञ्चार माध्यम अलजजिराका अनुसार मध्यस्थतामा संलग्न स्रोतहरूले दुवै पक्ष अहिले लिखित दस्तावेज आदानप्रदान गरिरहेको बताएका छन्।
पहिलो चरणको प्रत्यक्ष वार्तामा भएका सहमतिहरूमा दुवै देशको समान धारणा रहेको सुनिश्चित गर्न लिखित दस्तावेज आदानप्रदान गर्ने काम भइरहेको जनाइएको छ।
दस्तावेजहरूमा के के कुरा उल्लेख छ भन्ने सार्वजनिक भइसकेको छैन।
सन् १९७९ को इस्लामिक क्रान्तिका दौरान तेहरानस्थित अमेरिकी दूतावास कब्जा र अमेरिकी नागरिकहरूलाई बन्धक बनाएको घटनापछि यी दुई कट्टर प्रतिद्वन्द्वी मुलुकबीच ४७ वर्षमा भएको यो नै पहिलो आधिकारिक र प्रत्यक्ष वार्ता हो।
वार्तामा को–को सहभागी थिए?
अमेरिकी प्रतिनिधि मण्डलको नेतृत्व उपराष्ट्रपति जेडी भान्सले गरेका छन्। वार्तामा सहभागी हुनुअघि उनले पाकिस्तानी प्रधानमन्त्री शहबाज सरिफसँग भेटवार्ता गरेका थिए।
इरानको तर्फबाट संसदका सभामुख मोहम्मद बगेर गालिबाफ र विदेशमन्त्री अब्बास अराघची सहितको टोली सहभागी छ। इरानी टोलीले पनि प्रधानमन्त्री सरिफसँग छुट्टाछुट्टै भेटघाट गरेको थियो।
लेबनानमा इसराइली आक्रमण र कूटनीतिक पहल
यो ऐतिहासिक वार्तापछि पनि मध्यपूर्वमा तनाव भने कायमै छ। लेबनानमा तनाव जारी छ भने त्यहाँको स्वास्थ्य मन्त्रालयका अनुसार बुधबार इसराइली आक्रमणमा परेर मृत्यु हुनेको संख्या ३५७ पुगेको छ।
भग्नावशेषबाट शवहरू निकाल्ने र पहिचान गर्ने कार्य जारी रहेकाले मृतकको संख्या अझै बढ्न सक्ने मन्त्रालयले बताएको छ।
यसैबीच, अमेरिकाका लागि लेबनानी र इसराइली राजदूतहरूबीच टेलिफोन वार्ता भएको छ। दुई देशका अधिकारीहरूबीचको यो पहिलो प्रत्यक्ष सम्पर्क मानिएको छ।
अर्को हप्ता अमेरिकामा हुने भनिएको युद्धविराम वार्ता अगाडि यो संवाद भएको हो।
इस्लामावादमा भएको अमेरिका–इरान वार्ताले मध्यपूर्वको तनाव कम गर्न महत्वपूर्ण भूमिका खेल्ने विश्वास गरिएको छ।
-1746009348.jpg)
