काभ्रे–२ बाट प्रतिनिधि सभामा चुनिएका बदन भण्डारीलाई गाडी चलाइरहँदा 'राज्य नै हाम्रो हातमा आयो, अब जिम्मेवार ढंगले चलाउनुपर्छ' भन्ने सोच आइरहन्छ।
बदन राष्ट्रिय स्वतन्त्र पार्टी (रास्वपा) बाट पहिलो पटक प्रतिनिधिसभामा प्रत्यक्षतर्फ निर्वाचित भएका हुन्।
'जनताले राज्यसत्ता नै रास्वपालाई दिइसके, सरकार बनाऊ, नीति परिवर्तन गर्नुपरे गर भनेका छन्,' बदनले भने, 'अब जिम्मेवारी सम्हाल्न पछि हटिँदैन। इमानको जगमा, योग्यता र क्षमता प्रयोग गरेर लागिन्छ।'
तर मैले मात्र गर्न सक्छु भन्ने भ्रम आफूमा नरहेको उनी बताउँछन्।
'विज्ञ, सक्षम र आवश्यक मान्छे मन्त्रिपरिषदमा जानुपर्छ,' बदन भन्छन्, 'पार्टीमा अर्को ग्रहका मान्छे छैनन्। विभिन्न पार्टीबाट आएका यही समाजका राम्रा–नराम्रा सबै छन्। नीति–नियम स्ट्रिक्ट्ली लागू गरेर अघि बढ्नुपर्छ।'
निर्वाचनका बेला रास्वपाका प्रधानमन्त्रीका उम्मेदवार बालेन (बालेन्द्र) शाह पाँचखाल र बनेपामा केही मिनेटका लागि रोकिए। उपत्यका र आसपासका क्षेत्रका उम्मेदवारले बालेन शाहसँग केहीबेर भलाकुसारी गर्न पनि पाए। त्यसबाट उनको नजरमा बालेन शाहको एउटा चित्र बनेको छ।
'एक घन्टा भेटेर सबैकुरा चिन्ने त हुँदैन। देखिएको जति नहुन पनि सक्छ। देखिएको भन्दा फरक पनि हुन सक्छ,' बदन भन्छन्, 'चित्र हेरेर चरित्र थाहा हुँदैन, तर लोकतन्त्रमा उहाँहरू (रवि र बालेनलाई) देखेर जनताले मत हालेका छन्।'
बालेन शाहमा आफूले देश बनाउने हुटहुटी पाएको उनले बताए।
'देश बनाउने हुटहुटी भएको, खरो स्वभावको, निर्णय गर्ने क्षमता भएको व्यक्ति हो,' बदन भन्छन्, 'हामीलाई चाहिएको पनि त्यस्तै हो। युगले खोजेको नेता हो – बालेन शाह। उहाँसँग जनताको अपेक्षा धेरै छ। पूरा पनि हुन्छ भन्ने लाग्छ।'
बदनको परिवार पहिले आर्थिक रूपमा कमजोर थियो। काठमाडौंमा पढ्न आउँदा उनी कोठा भाडा लिएरै बसे।
'गाउँबाट आएका निम्न वर्गीयका कथा जस्तो हो मेरो पनि त्यस्तै हो,' बदनले भने, '२०६५ सालमा म महाबौद्धको महेन्द्र स्टोर नाम गरेको जुत्ता–चप्पल होलसेलमा काम गर्थेँ। तलब ३ हजार रूपैयाँ थियो। पसलका साहुहरू धुलिखेलका थिए। यस पटक उनीहरूले पनि मलाई मत दिए।'
त्यसपछि बदनले कहिले रेस्टुरेन्टमा काम गरे। कहिले विभिन्न सामानको मार्केटिङको काम गरे।
'तलब बढेपछि कम्पनी फेरेँ। तरकारी पसल गरेँ। जुत्ता–चप्पल पसल गरेँ। कस्मेटिक पसल गरेँ। सरस्वतीनगरमा क्याफे गर्दै गर्दा गोपिकृष्णको टिभी फिल्मीमा मार्केटिङको जागिर गरेँ,' बदनले भने, '८ हजार तलब थियो। जागिर छाड्ने बेला तलब ८० हजार पुग्यो। मार्केटिङबाट छिरेर स्टेसन म्यानेजर भएर छाडेँ।'
टेलिभिजनमा काम गर्दा उनको निकिता पौडेलमार्फत् रवि लामिछानेसँग चिनजान भयो। रविकी श्रीमती निकिता गोपिकृष्ण टेलिभिजन चलाउँथिन्।
रवि लामिछानेले राजनीतिमा आएपछि २०७९ सालमै बदनलाई काभ्रे–२ बाट चुनाव लड्न भनेका थिए। तर बदनलाई त्यति बेला रास्वपा बलियो शक्ति हुन्छ भन्ने विश्वास लागेन।
'पार्टी खोल्नेबित्तिकै मैले रवि लामिछानेलाई पत्याइनँ। रविन्द्र मिश्रले पार्टी चलाउन नसकेको देखेँ। उहाँको पनि त्यस्तै होला भन्ने पूर्वानुमान थियो,' बदनले सेतोपाटी पडकास्टमा भने, 'मैले राजनीतिक भविष्य दाउमा राख्नुहुन्न भनेर गइनँ। निर्वाचनको परिणामले परिवर्तनको पक्षमा मत रहेछ भन्ने लाग्यो। जनताले नयाँ शक्ति खोजी गरेको अनुभूति गरेँ। निर्वाचनलगत्तै रास्वपामा जोडिएँ।'
तर निकिता र रविसँगको चिनजानले मात्र राजनीतिमा नआएको उनी दाबी गर्छन्।
'चिनजानले राजनीतिमा लाग्ने भएको भए पहिल्यै लाग्थेँ,' बदन भन्छन्, 'म आफू र राजनीति र समाजलाई दिने योगदान देखेर लागेँ। पुरानालाई धक्का दिनुपर्ने छ भन्ने सोचेर रास्वपाको संरचनामा एउटा इँटा बनौं भनेर जोडिएको हुँ।'
गोपिकृष्ण टेलिभिजन बन्द भएपछि बदन अनलाइन व्यापारमा लागे।
'केयर–सप नेपाल भन्ने थियो। चीन, भारत, कोरिया र थाइल्याण्डबाट सामान ल्याएर बेच्न थालियो। इलेक्ट्रोनिक्स, हेल्थ एन्ड ब्युटी र सप्लिमेन्ट बेचियो,' बदन भन्छन्, 'अहिले नेपाली वस्तु उत्पादन गर्ने साझेदारीमा कम्पनी खोलेको छु। साबुन, स्याम्पू, टुथपेस्ट, फेसवास र मसाज गर्ने तेल बेच्छौं।'
अहिले व्यापारमा लागेपछि आफ्नो परिवारको आर्थिक अवस्था सुध्रिएको र मध्यमवर्गीय बनेको बदन बताउँछन्। तर सांसद भएपछि अब कम्पनी परिवारलाई हस्तान्तरण गर्ने योजना बनाएका छन्।
बदनलाई आफू मान्छेहरूसँग सजिलै घुलमिल गर्न सक्छु भन्ने लाग्छ।
'मेरो जे हो त्यो भन्ने र सत्यको नजिक बसेर संवाद गर्नुपर्ने स्वभाव हो,' बदन भन्छन्, 'धेरै राजनीति गर्नेहरू झुट बोल्ने, आदर्शवादी हुने गर्छन्। म हरेक बोलेका कुरा व्यवहारमा लागू गर्नुपर्ने भन्ने सोच्छु।'
उनलाई आफूमा 'एभरेज' क्षमता छ भन्ने लाग्छ।
'म एभरेज क्षमताको मान्छे हुँ। केही नजान्ने पनि होइन, सबै जान्ने पनि होइन,' बदन भन्छन्, 'मान्छे विज्ञ बन्न सक्छ। सर्वविज्ञ बन्न सक्दैन। यदि कसैले गिलासमा पिएचडी गरेको छ भने ऊ गिलासबारे विज्ञ हुन्छ, माइकबारे होइन। सर्टिफिकेट पढ्नु र समाज बुझ्नु फरक कुरा हो।'
बदनलाई अब मौका पर्दा 'डेलिभरी' गर्नुपर्छ भन्ने लागेको छ।
-1746009348.jpg)
