अमेरिकी राष्ट्रपति डोनाल्ड ट्रम्पले ग्रिनल्याण्ड सहज तरिकाले अमेरिकी अधीनमा नआए कठोर कदम अवलम्बन गर्ने चेतावनी दिएका छन्।
ह्वाइट हाउसमा पत्रकारहरूसँगको कुराकानीमा ट्रम्पले ग्रिनल्याण्डलाई जसरी भए पनि अमेरिकी नियन्त्रणमा ल्याउनुपर्ने र त्यसका लागि नरम हुँदा परिणाम नआए कठोर उपाय अपनाउने बताएका हुन्।
'उनीहरूको इच्छाको कुरा होइन। अमेरिकाको सुरक्षाको विषय पनि हो। हामीले ग्रीनल्याण्ड नलिने हो भने रूस वा चीनले लिन्छन्, जुन हामी चाहँदैनौं,' उनले भने।
ट्रम्पले डेनमार्कप्रति आफ्नो सकारात्मक धारणा भएको बताए।
'म डेनमार्कको ठूलो प्रशंसक हुँ। उनीहरूको पनि मप्रतिको धारणा राम्रो छ। तर रूस वा चीनले ग्रीनल्याण्ड कब्जा गर्ने खतरा छ। त्यसैले अमेरिकी कदम आवश्यक छ,' उनले भने।
यद्यपि आफ्नो चाहना सम्झौताको सजिलो बाटोबाट ग्रिनल्याण्ड हासिल गर्ने रहेको उनले बताए। त्यसरी नभए कठोर कदम चाल्न पनि पछि नहट्ने उनले बताएका हुन्।
त्यो कठोर कदम के हुन सक्छ भनेर भने उनले थप खुलाएका छैनन्।
ग्रिनल्याण्ड र डेनमार्कले ट्रम्पको घोषणामा जबाफ दिँदै ग्रीनल्याण्ड बिक्रीका लागि नभएको स्पष्ट पारेका छन्।
ग्रिनल्याण्डको सत्तारूढ र विपक्षी दलका नेताहरूले संयुक्त विज्ञप्ती समेत जारी गरेर ग्रिनल्याण्डका कोही पनि नागरिक अमेरकी हुन नचाहेको बताएका छन्।
'हामी अमेरिकी हुन चाहँदैनौं, डेनिस हुन पनि चाहँदैनौं। हामी ग्रिनल्यान्डर हौं। ग्रिनल्यान्डको भविष्य ग्रिनल्यान्डकै जनताले तय गर्नेछन्,' विज्ञप्तीमा भनिएको छ।
अमेरिकी प्रशासनभित्र रणनीतिक रूपमा महत्वपूर्ण डेनमार्क-अन्तर्गतको अर्धस्वायत्त भूभाग ग्रिनल्यान्डलाई कसरी अमेरिकी नियन्त्रणमा ल्याउने भन्ने विषयमा विभिन्न विकल्पबारे छलफल भइरहेको बताइएको छ।
यस क्रममा सैन्य हस्तक्षेपसमेत अस्वीकार नगरिएको जनाइएको छ।
यदि अमेरिकाले बल प्रयोग गरेर ग्रिनल्यान्ड लिने प्रयास गरे अन्य नाटो सदस्य देशहरूको प्रतिक्रिया के हुने भन्ने विषय अझै अनिश्चित छ।
युरोपेली नेताहरूले यस्तो कदमले सैन्य गठबन्धन नाटोमा गम्भीर असर पार्ने चेतावनी दिएका छन्।
फ्रान्स, जर्मनी, बेलायत, इटाली, पोल्यान्ड र स्पेनका नेताहरूले संयुक्त रूपमा विज्ञप्ती जारी गरी ग्रिनल्यान्ड त्यहाँकै नागरिकको हो भनेका छन्।
हालै ग्रिनल्यान्डवासीलाई पैसा दिएर अमेरिकामा सामेल गराउने प्रस्ताव पनि राखिएको सार्वजनिक भएको थियो।
ट्रम्पले ग्रीनल्याण्डवासीलाई प्रतिव्यक्ति १० हजार डलरदेखि १ लाख डलरसम्म दिन सकिने विकल्पबारे आन्तरिक छलफल गरेका थिए भनेर रोयटर्सले लेखेको छ।
ग्रीनल्याण्डमा करिब ५७ हजार नागरिक छन्।
राजधानी नुकका साइमन क्येल्डस्कोभले भने पैसा दिने प्रस्ताव कुनै हालतमा स्वीकार गर्न नसिने बताएका छन्।
'एक लाख डलर त के जति नै पैसा दिए पनि हामी स्वीकार्दैनौं। हामी ग्रीनल्याण्डका हौं। अमेरिकी हुँदैनौं,' उनले रोयटर्ससँग भनेका छन्।
-1746009348.jpg)
