अमेरिकाको एउटा संसदीय प्यानलले उन्नत चिनियाँ हतियारका कारण पाकिस्तानले भारतसँगको चार दिने लडाइँमा सफलता हासिल गरेको टिप्पणी गरेको छ।
अमेरिका-चीन आर्थिक र सुरक्षा समीक्षा आयोगले आफ्नो २०२५ को वार्षिक प्रतिवेदनमा कसरी चीनले सो संकटलाई आफ्नो अत्याधुनिक रक्षा उपकरणको परीक्षण र प्रचार गर्ने अवसरको रूपमा प्रयोग गर्यो भनेर व्याख्या गरेको द वायर अनलाइनले जनाएको छ।
भारतले प्रयोग गरेको फ्रान्स निर्मित रफाल लडाकु विमान खसाल्न पाकिस्तानले चिनियाँ हतियार प्रयोग गरेको कुरा चीनको हतियार बिक्री गर्न विज्ञापन गरेजस्तो बनेको पनि सो प्रतिवेदनले औंल्याएको छ।
'चार दिने झडपमा भारतमाथि पाकिस्तानको सैन्य सफलताले चिनियाँ हतियारको प्रदर्शन गर्यो,' सो प्रतिवेदनमा भनिएको छ।
चीनले द्वन्द्वका लागि नउक्साए पनि 'आफ्नो हतियारको उत्कृष्टतालाई परीक्षण र प्रचार गर्न द्वन्द्वको अवसरवादी लाभ उठाएको' प्रतिवेदनमा भनिएको छ।
कश्मिरको पहलगाममा अप्रिल २२ मा भएको आतंकवादी हमलाको जबाफमा भारतले मे ७ मा पाकिस्तानमाथि हवाई आक्रमण गरेको थियो।
त्यसक्रममा भारतका पाँच वटा लडाकु विमान खसालेको दाबी पाकिस्तानले गरेको छ।
ती पाँचमध्ये तीनवटा फ्रान्समा निर्मित रफाल, एउटा रूसमा निर्मित मिग-२९ र अर्को रूसमै बनेको सुखोइ सु-३० भएको पाकिस्तानले दाबी गरेको छ।
पाकिस्तानी विदेशमन्त्री इशाक डारले चीनमा निर्मित 'जे-१० सी' लडाकु विमान प्रयोग गरेर भारतका ती पाँचवटा विमान खसालेको बताएका छन्।
सो विमानबाट चीनमै बनेको 'पिएल-१५ मिसाइल' प्रयोग गरेर पाकिस्तानले रफाल खसालेको मानिन्छ।
आफ्नो रफाल लडाकु विमान खसालेको पाकिस्तानी दाबी भारतले स्वीकार गरेको छैन। तर विभिन्न सुरक्षा स्रोतको हवाला दिँदै अन्तर्राष्ट्रिय मिडियाले 'पाकिस्तानले कम्तिमा एउटा रफाल लडाकु विमान खसालेको जनाएको छ।
अमेरिकाको संसदीय प्यानलको यो प्रतिवेदनले पनि पाकिस्तानले रफाल लडाकु विमान खसालेको उल्लेख गरेको छ।
(विभिन्न अन्तर्राष्ट्रिय सञ्चार माध्यमहरूको सहयोगमा तयार पारिएको)
-1746009348.jpg)
